• مصر
  • السبت 22 من يونيو 2019 -- 06:53:30 مساءً.

رئيس مجلس الإدارة
ســـعــــد ســـلــــيــــــم

رئــيس التــحريــر
خــالــد السكــران

صدمة في الوسط الفني.. بعد وفاة هيثم أحمد زكي

الفنانة روجينا قالت: "إنا لله وإنا إليه راجعون". هيثم باذن الله في رحمة ربنا مع الناس اللي بيحبهم في مكان أحسن وارحم وأحن من اللي كان فيه. ربنا يرحمك يا هيثم علي قد طيبتك ويغفر لك ويجعل مثواك الجنة. أسألكم الدعاء له بالرحمة.
الفنانة هيدي كرم قالت: ربنا يرحمك يا هيثم يا زميلي العزيز. أنت من أوائل الناس اللي اشتغلت معهم في فيلم البلياتشو. كنا أنا وانت سنة أولي تمثيل ولسة بنخبط. انا عارفة انك عشت حياة قاسية نفسياً وعارفة كمان ان ربنا رحمك برحمته الواسعة علشان يجمعك بالناس اللي بتحبهم واتحرمت منهم.
الفنانة بشري: خبر مفجع ولكن اللهم لا اعتراض. زمان كنت اسمع الكبار يقولوا فلان ده ابن موت ومكنتش بفهم معناها لحد ما كبرت. وانا اظن انك يا هيثم ينطبق عليك مقولة "ابن موت" جيت ومشيت منها زائر خفيف زي ما تكون جيت عشان تمشي. فقدت امك وانت صغير وبعدها ابوك ودلوقتي ربنا أراد يجمعك بيهم في الجنة إن شاء الله. البقاء لله ولا إله إلا الله.
الفنانة ناهد السباعي: انا لله وانا اليه راجعون. مكنتش مصدقة غير لما روحت البيت. واجع قلبي طول عمرك من واحنا صغيرين علطول بتقولي: يا نودي أنا خايف اموت لوحدي في البيت ومحدش يحس بينا وحاسس اني هموت صغير وأضافت: دايماً كنت أرد أقولك انت بتقول كده عشان "رخم" ونكدي لو كنت صدقتك كنت فضلت علطول قاعدة معاك يا صاحبي وأخويا وجاري وعشرة عمري من ساعة م اتولدنا.
نجلاء بدر: عاش وحيدا ومات وحيدا. صاحب القلب الطيب والضحكة الحلوة والعيون الحزينة لا إله إلا الله ربنا يرحمه ويغفر له ويسكنه فسيح جناته.
الفنانة هنا شيحة: لا حول ولا قوة إلا بالله. إنا لله وانا إليه راجعون. لحد دلوقتي مش مصدقة وقلبي واجعني. هيثم زكي الحنين الطيب أبوضحكة صافية زي الاطفال. ارتحت ورحت للي خلقك وللي بتحبهم "يا أيتها النفس المطمئنة. ارجعي إلي ربك راضية مرضية. فادخلي في عبادي. وادخلي جنتي" داعية الجماهير بالدعاء له بالرحمة والمغفرة.
الفنانة مها أحمد: عريس الجنة بإذن الله يا هيثم. ربنا يرحمه ويحسن إليه ويجعله في الفردوس الاعلي "إنا لله وإنا إليه راجعون".
الفنانة درة: لا أكاد أصدق خبر رحيلك المبكر. وجعت قلوبنا. الله يرحمك يا صديقي يا طيب القلب ويجعل مثواك الجنة. وتكون في مكان ارحم واحسن ويجمعك علي خير مع والدك العظيم أحمد زكي ووالدتك الجميلة هالة فؤاد.
الفنانة إيمان العاصي: صدمة ووجع قلب. كأن احمد زكي مات تاني. كان نفسي تبقي إشاعة. بس قدرك يا حبيبي. ربنا يرحمك يا هيثم في الجنة إن شاء الله.
الفنانة لقاء الخميسي قالت: ابن الغالي. رب العالمين يرحمك ويغفر لك. ويرضيك ويراضيك ويطبطب علي نفسك الطيبة الحزينة الوحيدة المحرومة. اللهم اغفر له وافتح له أبواب الخلد في جنات الطيبيين ذوي الارواح الطيبة.
قال الفنان عمرو سعد: البقاء والدوام لله. حبيبي يا هيثم من النهاردة مافيش يتم تاني. نام وارتاح في حضن اغلي الناس امك وابوك. حزن وصدمة واحساس بالألم لكني لا أملك غير الدعاء ليك من قلبي وبكل صدق بالرحمة والمغفرة ولقاء الأحبة في سلام.
الفنان أحمد السقا: قال البقاء لله ربنا يرحمك يا هيثم. ويسامحك ويغفر لك. كنت اجدع واطيب الناس. ادعو له بالرحمة.
قال الفنان محمد محمد عبدالعزيز: طول عمره غلبان ومحترم وحياته صعبة من طفولته واستحمل كتير واتوجع كتير لما كنا نتقابل او نتكلم كنا بنرغي بالساعات وياما اتكلمنا علي ابويا وعلي ابوه وكنا بنقول عمرنا ما هنكون ربعهم. اللهم لا حول ولا قوة إلا بالله. اخر مرة واحنا بنتكلم من 15 يوما كنا بنفكر هل لما نموت هنقابل ابوك وابويا؟ ولما نقابلهم هانقولهم ايه وهايقولونا ايه؟ سبقتني وروحتلهم. السلام امانة لحد ما اجيلكوا يا اخويا.
الله يرحمك يا هيثم يا اخويا.
فيما حرص عدد كبير اخر من الفنانين علي نشر ادعية المتوفي للفقيد الراحل ومن بينهم ليلي علوي ونهال عنبر ورانيا ياسين واحمد وكريم فهمي وشيكو وهشام ماجد وانجي وجدان ومي سليم وإدوارد وكندة علوش وحسن الرداد ونشوي مصطفي ومحمد عبدالرحمن ومنة فضالي وأكرم حسني واروي جودة وامير كرارة.
ولد هيثم أحمد زكي في 4 أبريل 1984 بدأ مشواره الفني عام 2006 باستكمال ما تبقي من مشاهد فيلم حليم بعد رحيل والده بطل الفيلم الفنان الراحل احمد زكي. ليقوم بالعام التالي ببطولة فيلم البلياتشو. لكنه توقف عن العمل الفني لثلاث سنوات قبل أن يعود عام 2010 من خلال مسلسل الجماعة. ليشارك بعدها في العديد من الاعمال ما بين السينما والتليفزيون مثل مسلسل "دوران شبرا". الذي حصد بعده جائزة أفضل ممثل شاب في مصر وفي 2018 كان احد ابطال مسلسل "كلبش 2" واختتمت مسيرته الفنية بفيلم "الكنز 2".