إعـــلان
” ابن الوطن “
بقلم الأديب الشاعر :
عبدالله الهادى الصقر
———————-
يا بن الوطن
ياللى على كف القدر
كنت الإمام
وندهت للأحلام تعالى قدفى
بدر الآمانى فى القلوب
شق الضلام
من بين رخام الوهم
سهم الدم صاب
خبط على باب السما
ورمى السلام
عليت مقام الحق
ومحيت الخداع
وفردت باع النيل
موانى للسلام
شد الحزام
ياشعب واعبرللخلود
عدى حدود الماضى
وانظر للأمام
داخل زمام المجد
وشموخ اللى فات
حكايات صداها
فوق جبين االفلاحين
طواحين شقـا
متعشقا حب وحنين
الطين فدائى
والعرق هوّ الوسام
ياحب نام
واتغطى من برد السراب
الغربة عدت
من ضباب المجروحين
الغربة تاهت
بعد ما انهار الآنين
عين الحياة
شافت جنودنا اتكحلت
والرمش حزن .. وفرح
وشوية مرار
لم النهار الدمع
من فوق الخدود
الحلم عود
خضّرفى قلب المستحيل
والصبرخبط ع الدليل
اصحى بقى
شمع اللقا
نور حدود المؤمنة
والفجر واقف بالهنا
ورا كل باب
زهر الشباب
رايح لجنة ربنا طاهر بريئ
دب الطريق
تسبيح وذكر وترتيلات
زلزل آهات الحيرة
واغتال السكوت
اتشاهد الملكوت
وصلى ع الولاد
صوت المساجد
والكنايس كان حداد
شمس البلاد الحرة
غرة للى جاى
وازاى هتقطف
شهد بكرة اجوبة
متحجبة
يامصر بينا من زمان
وهتشربى كاس الهنا
حب .. وحنان
ونسمعك اجمل غنا
ونوصلك بر الآمان
