ذكريات أكتوبريه – سيناء ١٩٩٥
بقلم جمال الأفندي الزمر
الشمس من فوق القناه
بتغني ملحمة العبور
تفرش ضفايرها الدهب
تحكى كفاحك للسطور
******
من فوق رمال الجبهة
بأكتبلك يا سمرة ألف حرف
وسطورى دى متوزعة فى
تلات حروف (م ص ر)
الميم ملازى ومنيتى
أفرش رمالك بالورود
والصاد صباحك لحن
شادى بيتعزف نغماته
ماتعرف حدود
والراء روايتك تتحكى
لأبنك شهيدك يوم يعود
أبنك شهيدك لا ماماتش
أبنك هنا ابنك أنا
رافع راياتك فى السما
بأكتب نضالك ملحمة
******
فى الفجر صليت السنن
ورفعت آيات الدعاء
فجأة ألتقتنى بأحضنك
أتارينى بركان انتماء
****
مع طلة الفجر المسافر
بألمح ملامحك من بعيد
لسه صبية معطرة بدم الشهيد
يضحك صباح النصر
ويعود من جديد
ويقول
ياسينا يا أرض الدهب
غنى النشيد
دالقلب راسمك فى الوريد
*****
والشط ياسمره بيضحك
للنهار يضحك معاه
ويغنى ملحمة القناة
والمينا مدنه مشيده
باسم الإله
والموج مؤذن للصلاة
يسبق مداه
ويعدى شطآنك ورملك
صوت صداه
الله أكبر ياوطن
حى ع الصلاة
*****
لسه أيادى النصر ياسمرا
بدوس ع السلاح
ترسم طريق الحلم
وتغنى ملحمة الكفاح
والله أكبر ياوطن
حى ع الفلاح
الله أكبر ياوطن
حى ع الفلاح