حرنكش ودوم
وضحكة تدوم
وأبويا أللى شايل عنى الهموم
وامى اللى تطبخ وتغسل هدوم
وجارة تصبح
وتانية تقبح
وتضحك ف وشك من تانى يوم
مرايل مدارس وتوكة ف عيد
وكورة شراب فى شارع بعيد
وعموا أللى ساكن فى آخر المكان
يقعد يزعق عايز ينام
يقطع كورتنا
ولما نعيط
يسأل بكام
ويلعب معانا وهو سعيد
وقصة حبى لبنت الجيران
تسيبنى وتمشى
وتفضل فى قلبى لأبعد زمان
وبنت الجيران
لما بتفرح
بنفرح كمان
ولما بنحزن
شارع بيحزن
ويمشى الامان
وتطلع غيوم
ونحن تانى ونغنى تانى
حرنكش ودوم
وضحكة تدوم
ونعمل زينة
قرب الفضيل
محمد ومينا
يملوا السبيل
وجارنا الوحيد
ولادنا ولاده
قبل السحور
سحوره ف ميعاده
ويفضل لآخر عمره يصوم
وحشنا بجد طعم الحرنكش
وعمو أللى واقف يقطع ف دوم
وابويا أللى شايل عنى الهموم
وضحكة امى أللى كانت تدوم
وعمرى أللى سابنى يوم بعد يوم
وحشنى بجد