بحروف حزينة يقطفها من ثنايا هموم الحياة ينسج الشاعر الغنائي الإسماعيلاوي محسن أبوزيد إطلالة ألحانه الجديدة.. لحظة غروب،
وكما عودنا يهديها لقراء ومتابعي منصة المساء أون لاين كما أهدانا قصيدة أخري بشعر العامية” مش كل حلم” ..ننشرهما في هذه السطور..
❤🔥
لحظة غروب
………….
كل شمس مهما تطلع
تنتهي بلحظة غروب
والصراحة كتير بتوجع
في المواجهة تشوف هروب
واللي وعدك.واللي قالك
كلمتين وخلاص يادوب
في المعاملة ابقي أعمل الف حد
والكلام لو مجاملة
أوعي تاخده في لحظة جد
واللي أخدك للنجوم
وصنع لك ملحمة
دي حاجات مش راح تدوم
ينزلك للأرض من أبعد سما
أوعي تمشي ورا العشم
ينتهي بصدمة وألم
واللي للدنيا فهم
ضيعه إحساس كذوب
كل شمس مهما تطلع
تنتهى بلحظة غروب
في الحياة تغيير معالم
واللي تعبان اللي فاهم
مرة تبقي فيها عالم
ومرة قول تلميذ يادوب
كل شمس مهما تطلع
تنتهى بلحظة غروب
أوعي ع الإخلاص تقول
شوف حكاية دول ودول
يبقي في وشك حبيبك
ومن وراك ياما يقول
وف زمنا اللي أسهل
هو بقي بيع القلوب
كل شمس مهما تطلع
تنتهى بلحظة غروب
❤🔥
مش كل حلم
……………….
مش كل حلم بنحلمه بنصدقه
ولاكل إحساس بيقابلنا بنعرفه
ولاكل غربة بتبقي خوف
ولاكل نظرة بتبقي شوف
دنيتنا دي مشوار طويل ماأصعبه
فيه اللي يوجع قلبنا ونوجعه
مش كل حلم بنحلمه بنصدقه
مش كل من حلفوا اليمين صادقين
ولا كل من قالوا كلمتين عاشقين
ولاكل وردة عطرها فواح
ولاأي كلمةتقدر تداوي جراح
ولا أي ضيقة بنلقي ليها براح
ولا كل من قال ياحبيبي نصدقه
مشوار طويل وياما شفنا جراح
وصبرنا صبر أيوب ولسه براح
صبر السنين والمستحيل نرتاح
والحب لاريحنا.ولا ريحه
مش كل حلم بنحلمه بنصدقه
لا من الغرام بنتوب
ولافادنا صبر أيوب
ورضينا بالمكتوب
لاإرتحنا .ولاريحه
مش كل حلم بنحلمه.بنصدقه
وتعبنا م لتنين .فاكرين.ولاناسين
لا قدرنا يوم ع الجرح
ولا وصلنا لفرح
وزرعنا شجرة صبر
لاعرفنا. ولانعرفه
مش كل حلم بنحلمه بنصدقه.