ب 63 قصيدة سابحة فى تأمل الحياة الاجتماعية ووصف الحياة الواقعية صدر الديوان الزجلى الجديد ” من قلبى لك حكاية” للشاعرة دعاء فتحى ابنة محافظة الوادى الجديد والمقيمة حاليا فى المملكة السعودية وتعمل معلمة رياضيات وحاصلة علي شهادة دكتوراة في مجال الشعر والإعلام وحقوق الإنسان.
يتكون الديوان من مجموعة من الازجال المتنوعة عن المناسبات مثل رمضان والاعياد ومدح الرسول صلى الله عليه وسلم والبعض من الزجل الرومانسي في الحب والفراق ووصف للحياة الاجتماعية والواقعية.
تقول فى إحدى القصائد:
ياصباح ونادي إفتح ياهادي بابك للمحتاجين
دي البت خضرا قايمة وشاطرة علي طشت العجين
وانت يارزق إيدك معاها وزع منين
وسوبيا وتمر هندي من الواد حمادة
آه ياليل ياعين
وسع شوية دي تريلا جاية وخدلك يمين
نادوا يابلية تلاتة ساقعة للجزارين
وهبة وصفية في الحارة ديا بيقولوا يامين
ياخد جوافة وفراولة صابحة وأحلي تين
والبت طاطا بتجيب بطاطا ومخ وسمين
وخبط وعالي وقول يالالالي للي عاوز أنبوبتين
طعمية سخنة وفول محوج للواد ياسين
وانت ياعنتر سلم وصبح عالبقالين
وردة حمرا ياست الكل وعود فل للمخطوبين
يابيه يابيه ستين جنيه حنتور ليك لفتين
صباحكوا سعادة فتلة وسكر زيادة في كوبايتين
وتقول فى قصيدة اخرى:
انا العاشق اللي ما عنده صبر
انا البدر اللي غرقان في عيونك
يا سهر
ياللي زي اللولي في حضن الصدف
ياللي متخبي ف جمالك اكتر كتير م اللي اتعرف
وان جت عيون الشمس في عيونك
تخجل عيون الشمس من نورك وعيونها هتنطرف ويستخبى القمر
ياسهر
ياللي اسمك اتكتب بشوق من لهب،
والنقش فيه كان بالدهب مرسوم وبالعشق اتحفر
ولو بينك وبيني بلاد
انا قلبي مليان بالعناد
حبك هيبقى ليا زاد
وفي عيونك يحلى السفر