غيض متجدد من فيض إبداعات شعر العامية المصرية ينسج حروفها الشاعر د.صبحي الإمام رئيس الاتحاد العربي للأدب والثقافة أهداها لمنصة المساء والجمهورية أون لاين ،في باقة من ثلاث قصائد ، ياريتها كات دامت، حكم الكبار مدرسة، يرحم زمان وليالي زمان..
✍️
(ياريتها كات دامت )
القصة م المبتدي
مش وزن ولاقافية
لما الكلام ابتدى
النية كات صافية
كانت المحبة اساس
وقلوب كمان دافية
والبركة كات في الرزق
بالصحة والعافية
خيرها ماكانشي كتير
لكن مكفي الكل
وماكانشي فيها فوارق
ولافقير يتذل
والحب كان يجمعنا
العصر بحصيرة
بقلوب تفيض اخلاص
لاحقد ولاغيرة
طالبين نضبط كلامنا
بالقافية ويا بحور
والقلب مليان حقد
صاب الجميع بفتور
والاخ قاعد لاخوه
ع الكلمة يتربص
خاض الجميع في الكل
وفي عرضه بيخبص
ملعون ابودي حياة
مع وزن مع قافية
وبإيه يفيد الكلام
لقلوب ماهش دافية
الكلمة في المبتدى
تخرج من الإحساس
توصل قلوب الكل
يحصل معاها جناس
وتصفى بيها النوايا
لاحقد ولا وسواس
………
(حكم الكبار مدرسة)
اسمعها مني ياولدي
كلمة بألف كتاب
إياك تخون العشرة
أو تكون كداب
أو يوم تخوض في العرض
و تصاحب المُغتاب
حكم الكبار مدرسة
وكل حكمة كتاب
رزقك ياولدي آتيك
لو كنت راكب خيل
راح يسبقك ببراق
اسع . و شد الحيل
و سيبها ع الرزاق
اياك تصاحب عويل
راح تفقد الأخلاق
سيدنا الحبيب النبي
مبعوث يكملها
وتفيد يإيه الحياة
من غير أخلاق تجملها
…………
(يرحم زمان وليالي زمان)
كان عندنا في البلد
المش مليان دود
وقلوب ماليها المحبة
ورحمة مالها حدود
ولو تزور الفقير
بروحه ليك بيجود
القاعدة كات ع الحصيرة
واللبس كان كستور
وكاوتش باتا الابيض
ويا القميص دمور
والوش كان يبتسم
ويشع منه النور
وشوية قالوا التقدم
ونساير الموضة
البنت لبست مقطع
والواد وراها بشورت
طفحت حياتنا ببلاوي
وكأنها بكببورت
وحبة حبة وكملها
عم الفيس
وتفيدة عملت اميل
واسمها بلقيس
وعويس مدلع نفسه
وسما نفسه قيس
شفنا العجي يا اخوانا
من يوم م غاب الدود
فلت العيار للجميع
وشباب مالهوش قيود
باتون ساليه ياجدع
ومعاها شوب بلاك
مخ الجميع قد لسع
واتحرقت الأسلاك
يارب حبة صبر
من غير عدد وحدود
وساعة صفا بقدرتك
لو لقمة مش بدود
