وجعت القلب يا ” ريان ”
خمستيام في ضلمة بير
ومتشعلق يا روح أمك
تجيب يا بني العزيمه منين ..؟!
ومين يقدر يشوف شوفك
في حبسة موت
تشوف اليتم وتحسُّه
تعيش الوحده
وبتشرب عطش م الخوف
وتاكل رعب من حالك
في ليل حالِك
لا صبح قلوب
يحن عليك ويفتح لك
ينورلك
ولا نجمه في نص الليل
تبص عليك
وتحضن قلبك النونو
عيون قلبي
بتبكي عليك
يا واحد من عباد الله
لا تعرف معنى
للدنيا
ولا تعرف أمل في حياه
كما سيل
من بشر أطفال
في كل مكان
من العالم
مشردها قلوب جاحده
في قلب خيام
تدوق برد الشتا والتلج
مشتتها إيدين قاسيه
بتهدم كل شئ فيها
وآه يا وجع قلبي
وآه يا حسرة الدمعه
على أطفال
في عمر الورد
على أحياء تعيش الموت
في كون ربي
في سوريا
وليبيا
وفلسطين
وفي بغداد
وفي صنعاء
وفي أفريقيا
والسودان
وكل مكان
وعالم مات
بإحساسه
ومات
كل الأمل
في ضمير
عماه حيسي
مالوش لازمه
وأصبح بس يتسابق
عشان يملك
لغواصه
وطياره
ودبابه
وكام راس
صاروخ نووي
وكام قاعده
تزوَّد قوته الباطشه
سباق مجانين
نسوا إن الإله
قادر
يطربقها
على راسهم
قريب جداً
بإذن الله
يشوفوا حكمته فيهم
قصاد عينهم
كورونا واقفه بالمرصاد
وميكرون جاب وراها
تمام
آيات الله بننساها
كما مات في سريره
شارون
تمن سنوات
من الغيبه
كما النمرود
كما فرعون
كما قارون
كما ابرهه الأشرم
كما كل اللي عاش
جبروت
وولت بيهم الأيام
والأزمان
وجعت القلب يا ” ريان ”
دي رحمة ربنا
تسبق
وله حكمه
كما أطفال كتير ماتوا
عشان أمر الإله نافد
بشأن كبير
نشوف دمع القلوب حنِّت
وسالت سيل
كما الشلال
قلوب شافت في لحظتها
دموع ” يعقوب ” علي ” يوسف ”
وشافت موت في قلب خيام
بيحصد ورد أمتنا
ويخطف
بهجة الأفراح
وعهد الله
ما فيه باقي على حاله
كتير أصبح كما ” الحجاج ”
كتير أصبح له قلب ” قابيل ”
ونتسابق على دنيا
ماليها دوام
شعوب مغلوبه
على حالها
معدش أمان
في أي مكان
ما دام الحب
مش لاقي
قلوب
بيضه
تحابي عليه
في ضل حنان
وجعت القلب يا” ريان ”
6 من فبراير 2022 م
