وتعانق الحروف والكلمات عبق الذكريات،مع ماضي جميل، مع الحضن الدافيء لكل أم ،رمز العطاء والمودة والرحمة والسكن والتضحية والعطاء..
وبحروف الفنان المبدع ينسج الإعلامي والشاعر الغنائي الكبير محسن أبوزيد حروفه المنمقة، بأسلوبه الخاص الرشيق ليطل بها علينا من خلال منصة المساء والجمهورية أون لاين ، بثلاث قصائد مشاركا فرحة المصريين بعيد الأم ، ويهديها لروح أمه الفاضله ،”رحمها الله وأسكنها الفردوس الاعلى” ، حيث يري فيها صورة كل أم مصرية أصيلة ،لم تعرف يوما إلا العطاء والإيثار والقيم الإنسانية النبيلة، وكل ما هو جميل وأخرجت رجالا يعرفون معني كلمة وطن..
إنها كلمات من القلب حم
زينت بعناوين ..
و”كان رضاها عباده”.. “صباح الحب يا حبيبة”.. يا طيبة..
نعرض لها في هذه السطور..
💚🌹
*(وكان رضاها عبادة)*
وحق اللي بينك وبيني
وأجمل أيام عمري وسنيني
يا أجمل ما ليه ونور نن عيني
بقولك يا أمي تعبني بعادك
وحشني حنينك. وحشني ودادك
وحشني ابتسامك
ورقة كلامك
وعطفك عليا
ياأغلي ماليا
يا روحي وعنيه
وفجر المحبة
والطلة البهية
بعدك يا أمي كتير حاجة غابت
سنين حلوة ضاعت
بصارحك يا أمي الحياه مش جميلة
وبعد رحيلك مافيش ليه حيلة
سوي أن أروح عند قبرك وأبكي
وبعدك ياغالية لمين قلبي يشكي
بعادك خد كل حاجة حلوة
وانتي المحبة وأنتي المروة
وكنت أوصفك ف القصايد
وكنت اكتبك أحلي غنوه
مازلتي يا أمي ضميري اللي جوه
وأه لوتعرفي وجع الرحيل
وأن السعادة بقت مستحيل
وانتي كلامك .حنانك. ابتسامتك
ضميرك النبيل
وفجر اللي طالع جميل
يا أمي أنتي نيل
بحبك ما فوق المحبة بحدود
ولو فيه معجزات
هطالب زمانك يعود
فاكره عيدك معايا
وأنتي البنفسج.وأجمل ورود
وأنتي إبتسامة بتمحي المشقه
بحبك ف قلبي مع كل دقة
ولما تناديني .ماعرفش أقولك
في يوم مره لأ
يامشوار حياتي اللي عشته سعاده
وحبي لكيانك اللي واصل لحد العبادة
دلوقتي يسألني أبني
أقوله يا مادا
تيته سابتنا لزماننا اللي قاسي
يقولي فاكرها ولا عمري ناسي
وهي تجيبلي ملابس مقاسي
وتحضني يابا
تبوسني ف خدي وبوسه لراسي
تيته ف حياتنا كانت شيء أساسي
تيته يا بابا دي سر السعاده
زمان كنت بفرح تقولي يا مادا
أقولك ياابني
كان رضاها عباده.
💚🌹
*(صباح الحب ياحبيبة)*
————————-
مع مارس تتجدد أحزاني
صباح الحب ياحبيبة
صباح الصدق والطيبة
صباح المسك والعنبر
صباح الشهد والسكر
وأقول أكتر
ومهما قلت وأعبر
منيش قادر أوفى الدين
وأنتي ياامي نور العين
وأجمل وردة في البساتين
وبحر حنين
وأجمل ضحكتين طالعين
وزيك مين
منيش لاقي
وبعدك إيه
مفيش باقي
وكنتي تعاني وتلاقي
مفيش غير بس أشواقي
أيامنا وذكريات حلوين
ياه علي ضحكتك ليه
ياه علي بحر حنيه
وأحلى نغمة تنهيدك
أقوم الصبح أبوس أيدك
وأقولك ياقمر ليلي
ياست الكل ادعيلي
وحق الضي ف عيونك
وحق اللي خلق كونك
انا بدونك ولاحاجه
عيوني ليكي محتاجه
ياعطايه ياوهاجه
ياست الكل ياامي
تعالي كبري وسمي
بحبك ليه غطيني
وضميني ودفيني
معاكي بلقي كل حنان
ياحضن أمان
بأجمل ماراي الإنسان
ياساكنة القلب والوجدان
يابسمة شوق وأنا فرحان
ملاك بيواسي في الأحزان
وأنا واقف علي بابك
وبتعبد ف محرابك
أصوم وأصلي وادعيلك
وأغني لك
وأحفظ كل مواويلك
في عشق الحق والاوطان
ولاواحد ولاعشرين ولامارس
ولا طالب ولادارس
ولاحاكم ولافارس
ولا حامي ولاحارس
كفاية بيكي أكون حاسس
بأنك أنتي سر الكون
تهون الدنيا عمري ماهون
تخون الدنيا عمري
ماخون
عشان يااصيلة علمتي
وكبرتي وفهمتي
أوفى ازاي
وأخلص للوطن واصون.
💚🌹
*(ياطيبة)*
يا طيبة
ولافيش في طيبتك في الوجود
ياحنينة
حنان مابعرفلوش حدود
عطشان في نبعك برتوي
يااغلي من كل الورود
كل الهموم عني بترحل
لما ارتمي في حضنك وأعود
الكون كده بلقاه براح
وتدوب كما التلج الجراح
ومعاكي بس
بحس بالفرح الحقيقي
ياشمعة بتنور طريقي
ياكلمة حلوه تبل ربقي
وغنوه في الحب المباح
يااغلي من كلمة عزيزة
ياكنوز دهب
يا أرق من النسمة الرقيقة
حتي في لحظة غضب
يانور بيملا الأمكنة
يا أحلام جميلة وممكنة
يا إبتسامة ليل
بتمحي ميت مليون تعب
يابحور حنان
ولاعمر نيلك يوم نضب
يامعلماني الصدق
والشعر إزاي اغزله
افتح كتاب الحب
أنتي في أوله
والحب ليه مليون سبب.
💚🌹
