في محاورة أدبية بديعة وتحت عنوان”هأعيد حساباتي من تاني” تأتي الإطلالة الجديدة للشاعر الأديب الإسماعيلاوي بدر خليفة عضو اتحاد كتاب مصر وعضو مجلس إدارة نادي الادب بالإسماعيلية والمحاضر بالهيئة العامة لقصور الثقافة يقول فيها..
..هأعيد حساباتى من تانى..
عشان أقدر أكون عادل
هأعيد حساباتى من تانى
وأشوف لوكنت أنا الظالم
أو كنت أنتى اللى ظلمانى
هألملم كل أوراقى
وأقيس العمر بالثانية
وأشوف فى شبابى إيه باقى
وإيه أخدتى يا غالية
بمحض إرادتى ورضايا
عاهدت الله أكون صاينك
أكون حامى تراب أرضك
حافظ عرضك
ولانك ساكنة جوايا
وهبت الروح عشان خاطرك
عشان شمسك ..عشان ظلك
عشان شيخك..عشان إبنك
عشان قلبى أسير حبك
عشان أمنك.. ودا منايا
هأعيد حساباتى من تانى
عشان أقدر أكون عادل
فى أى كلمة خنقانى
وخايف أقولها أكون خاين
فى حاجات كتير أنا..
شايفها
وحاسسها
وعارفها
وعايشها
ومش قادر أقول أه..
لان الأه ..
بتوجعنى
وتدبحنى
وتتعبنى
وتألمنى
ولا مرة تريحنى..
ومن غيرك هيسمعنى؟؟!!
ولا قادر أقول لا
لان الــ لا
تخلينى بكون ضدكِ..!!
وانا من صغرى ما عارضتكِ
ولا خونتكِ
ولابعتكِ
فياريت تقوليلى يا بلدى
عقابى ده ليه..
وذنبى إيه؟؟!!
عشان حبى..؟؟!!
عشان طبيتى..؟؟!!
عشان عهدى اللى أنا صونته..؟؟!!
عشان قسمى اللى أنا حلفته..؟؟
وعمرى فى يوم ما خالفته
يكون جزاتى أنول ظلمك؟؟!!
دأنا اللى عمرى ماظلمتك
ولافى يوم عصيت أمرك
قوليلى يا بلدى..
بعدل االله
أنا المظلوم ؟؟؟
والا أنا ظالمك..؟؟؟
….
