(1)
دنيا غازيه تلاعبك بالشفتشى المجنون
وتسيب ملاعبك وتجرى زى فرسه حرون
خيطها ملعبك وفاكره درك المكنون
جبال من التبن تعلا وخاصمت الحبه
ترقص معاك فى البراح لو انتشيت حبه
تغمز رموشها وتهجرك لو العيون حابه
ومين يداوى الأطبا غير سر “كن فيكون”
(2)
البحر فاض بالجروح .. أنا قلت فاض عَلَمٍين
أغراب ومـــركبنا مارسيتشى فى يوم عَلَمٍين
رافعين إيدينا للسما ع المركبه وكإنهم علمين
م الشرق للغرب توهنا ونص الضلمه حاصرتنا
بنغنى زى الحمـــام بس الكلام بيفيض بحسرتنا
لو كنا مدينا الوصال فى الصفا على قد حصيرتنا
ما كانتش كلمتنا يا ريتنــا فضحتنــا فى العالمين
(3)
رضيوا بظلم الشجر وقعدوا بالتراب ع التل
واحد جهول م الحوش والتانى تور مختل
ياللى مشيت ع الحصى ورضيت بنغز السل
افتح جروحك للهوى وطير بلا جناحات
النخل يرمى الرطب لو صاصت البلحات
شيل العفار والمرار من دمل الجروحات
وانسى اللى فات واقرا الشموس فى الضل
(4)
دا جسم مين دا اللى الجروح المؤلمه كاسياه
جسم الطبيب الحبيب اللى ماطالش دواه
شوفت الليالى فى قلبه و الدموع مالياه
أنا قلت أمس بريقى مسة نور على جسمه
وأكتب على كفى حنان روحه و حروف اسمه
لقيت جروحى و روحى حته من رسمه
طبعت وسمه على دراعى .. رأيت الله
(5)
الفضل ليك يا قمر يا بو عنقودين سمحين
بيسقطوا ورد الهوى وفى الدوا مسامحين
حبات تبات طيبه سكرها من ريق الحسين
جنينة العشق ما فيهاشى ثمار معطوبه
طوبى لمن مسته بجناح الحنان طوبى
ع الحجر ينزل رطب بلا هزه ولا طوبه
العشق مش سبوبه والنور مالوش بياعين
(6)
إرميها تحت المداس وأقطف م الشجر عناقيدك
دنية وحوش زى العدم لو تمسكه فى إيدك
وأحضن جناح الندى بالرضا لو الندى يريدك
خليك جنينه وخلى بق الغلابه يشتهى ويدوق
النور حصان رماح بالمحبة رايح بلاد الشوق
واعتق لسانك فى المقام سر المقام مطلوق
وفوت عديم الذوق واشترى نور الهوى لمريدك
(7)
سلمت نفسى للسما وعملت روحى جناح
لما لمست النور وبقيت عفار فى الرياح
خدتنى حبة مطر ورجعت طين وجراح
حنيت على النباتات ورقصت ع الورقات
شوفت الفراشه بتحمد رقة اليرقات
روح المتيم بقت فوق الأراضي راقات
والحزن عدا وفات نقط ورود وسماح
مسعود شومان
