»»
“نجيبنا”برقيات حب للأديب العالمي نجيب محفوظ صاحب نوبل يسطرها الأديب أمل زكريا بحروف مفعمة بالحب والفخر والاعتزاز..
أشار الأديب لمنصة “لمساء أون لاين” أنه يحلم بأن
بأن تنقش هذه الكلمات علي جدارية في أي مناسبة او تكتب في متحف نجيب محفوظ باللغتين العربية والإنجليزية.
🍂
نجيبنا
حكي حكايتنا وتفاصيلنا
وأصلنا من أيام الفراعنة
علشان كدا هو كبير حارتنا
وبين قصر الشوق والسكرية ،وحميدة
ومحجوب في القاهرة الجديدة ..
ودانا وجابنا
علي اللص الحقيقي عرفّنا
وفي طريق صابر توهنا معاه
ولفينا علي العطوف ومرجوش
وعدينا علي الشحات اللي بيدور علي المعني
والنور والوجود جواه
وللفيشاوي وخان الخليلي رجعّنا
***
يا أولاد حارتنا دينا وقيمنا والعلم ..
أساس حضارتنا
واللي يساعد الناس عمره ما مات
زي الست عين عاشت ما ماتتش
عند التكية سمعنا الأناشيد الروحية
خلت الحرافيش تهتف .. العدل والحرية
في حديثه كل صباح ومساء.. شخصيات وعائلات
صورلنا تاريخنا بالحروف الأبجدية
علشان كدا نجيبنا معشوقنا وكبير حارتنا
***
الناس في العوامة مش ضايعة
والله لينا لازمة بس مافيش حد بيكلمنا
زهرة بريئة وطاهرة
واخدة الكل في حضنها وصابرة
زهرة متستاهلش كدا منا
لازم صرخة السكات هيضيعنا
***
في سيرته الذاتية قدمنا بصيرة للبشرية
والعشق اللي مالوش نهاية
شاف أمه في سيدنا الحسين بتصلي العصر
سمع صوت جميل في حلمه الأخير
زروني كل سنة مرة ونزلت دموعنا
الف سلام وتحية يا جبرتي العصر
يارب العالمين يارب العالمين
تنبت أرضنا تاني لينا نجيبنا ..
🍂
يذكر أن الكاتب أمل زكريا صدر له مؤخرا كتاب “الرسائل الصوفية في أدب نجيب محفوظ” ضمن إصدارات معرض القاهره الدولي للكتاب 2023 ،وعرض الكاتب لمختلف رؤي الأديب الكبير الراحل نجيب محفوظ حول قضية التصوف والإيمان.
