راهنت عليك بعمرى ..قصيدة للشاعر أشرف عتريس

(1)

مش عينى اللى شايفاكى صبيه ,,

ده الزمن الى خاف يقرب لك ,,

عشان معرفش يلمسك بالأذى ..

إن كان ليا أندهش من روعة المونتاج ..

فكام لقطة غابت عنّى من غير قصـــد ..

زى المافيولا لما بتنسى حاجــــــــات ,,

يا لحم ، دم  ، راكور  ونبض ..

ده الزمن ثابت فى الكادر ياعاليه ..

والكل تحت الأرض    !!

(2)

وحدك .. ومراية الحمام  ,,

ياشفايف بتقرب تلمس بعضيها  ,,

حلمك رافض يغرق فى الفراغ ,,

فى الدخان فى الصهد وريحة الدفـا  ,,

الحزن يتسـرسب بره البـاب  ،،

قاصـد ناس تانيين غيـرك  خالص ,,

فتخافى على العصافير والقطة السيام  ،،

والروح اللى بتفرد جناحاتها على الشازلونج ،،

منتظره طلوعك من غير الروب تسكن جواكى  ,,

وتعلن للعالم انك فيرجن  ،،

رغم الغيم والخراب ..

(3) 

وشك بيلمع ،،

مكبرتيش مع إنك من سنى  ,,

وكل مايكبر سنى بخاف أكتــر  ,,

لو أشـوف حضورك يقتلنى  ,,

يبقى مين اللى هيتصـدر المظاهرة  ,,

يضم الخوامس ويفرك باقى السنين ع الطريق  ،،

نصادق المخاليق عشان خاطرعيونـهم  ،،

رحمة باللى حابب يزور الجنة  ,,

واللى خايف يموت زيـىّ وغيـرك يشيلنى  !!

                               (4)

قبل مايموت النهار ويبقى شاهد مَلَكْ ..

كان قاللى : مهر البنت مش عندك ،

بس ماتموتش بالساهل عشان خاطـرى  ..

متخافش من الليل مهما مد عينيه قدامك  ..

من ساعتها وقلبى عاشق للحريق والمية تجمد لى  ..

عارفك ياجبروت لكن هعديلك من فتحة البرجل دخـان ..

هطلق عليك جيوش النمل تهزمك  ..

أنـا المارد من طاقة شمس حراقه  ..

هقتل فيك العتامه ..

يا أول من هَلَكْ ..

قد يعجبك أيضاً

ندوة العربية للحوار تناقش أزمة التفكير النقدي في العصر الرقمي

11 أغسطس، 2026

“الاختلاف وتقبل الآخر”.. محاضرة بدار الكتب بطنطا

11 أغسطس، 2026