إختار لك موته بدون تفكير
لا تموت موجوع !
لا تموت م الجوع !
إختار ويايا وعرفني
الأحسن تستني يجيلك !
اوتجري تقابله وتتحداه
أقعد واستنظر واستناه ؟
طب من هيزقق ف الأفواه ؟
أفواه عصافير بتزقزق جوع
طب مين هيحن علي البردان
ينفخ في ايديه
ويديه الود لحاف يكفيه
ويزيح البُمب مابين رجليه
و يشيل الخوف الساكن فيه
ويطفي النار جوا الموجوع
ويهش الجوع
ويمني بقفه عيش وغموس
دا قليل الجوع حلم اتحقق
والنور مقطوع مش من عَندك
ولا عٍندي عشان قاصد اعاندك
الكارت خلاص قالع بلبوص
و الجيب مقطوع كلب بيلهس
و النار دي رماد همدت نامت
و القدر خلاص إتباع في مزاد
و الطوب موجود كتر خيرك
و الكدب علي المكشوف اتذاع
ومعدش العش يلم مدام
القش اتباع علشان القوت
الجوع ملحد كافر زنديق
لو حتي في ايده اله ملهم
هيغمس بيه وقت العُسرة
الحوجة سبيل لطريق واحد
وعشان تشحن محتاج لرصيد
أنا صيد ف شٍباك الفقر شبك
محتاج في حد يخلصني
أنا جرح سؤال علشان عاطل
محتاج في حد يسرحني ؟
أنا رب النعمة خلاص إرتاح
استغني وسابني وسرحني
أنا باطل لجل مليش ومفيش
فيه حد يماشي بلاط ممسوح
أو يمسح شعري و يسرحني
أنا أصبح ليا حداكم فيش
مطلوب والمُحضر شال بابي
علشان حافي القدمين والايد
في حد هيجي ويضمني ؟
أنا بٰقي ملان ميه ومنفوخ
لو قولت هترتش تدينوني
أنا عمري ف بطن الحيط كامش
أطرش وأصم ونظري ضعيف
ف بلاش تسأل على شيء معلوم
قدامك أهوه شمس بؤنه
أو مد ايديك ان كنت كفيف
ف حاجات باللمس تبان اكتر
مملوكشي غير بس ضلوعي
ان سدت إخلع لك ضلعين
وهو ربي يعين من غير أضلاع
و اوصل لنهاية بدون تبرير
أوصل علي جوع منهك موجوع
واقعد مع نفس اخد وادي
ازاي أخد و ازاي أدي ؟
وأنا قدي كتير منخور عوده
لو ورقه سقطت من شجرة
مش ممكن تاني لفرع تعود
لكن أوراق كل الأشجار
هتكون تابع واصل لخريف
تخاريف إن قلت ف يوم أقدر
أقعد واستنظر واستناه
أنا رايح أواجه وجه لوجه
إن كنت الموت أنا بتحداك .
