أنا..
الباب الكبير
جسمي ..
مش لحم ودم
مع إن ضلفتين صدري
مفتوحين
علي قد الفرح مايساع
مفتوحين
زي باب الجنة
في عيون ناسك وزاهد في العبير
مفتوحين
زي ضحكة روح لفرد حمام كان محبوس وانطلق
أنا ..
مش لحم ودم
أنا جذع شجرة كبير يا ما طرح ضل
سارحة جدوري
وعافقة في التراب الكريم
شارب ..
من دموع الفرح
لما الندي يبوس الفجر
متوضي ..
من بير الحنان البكر
لما الندي يبوس الفجر
واقف وحيد
لا عمري مرة ركعت
ولا السجود هيفيد
أنا ..
مش لحم ودم
أنا..
جذع شجرة كبير ياما طرح ضل
قطعتني إيد المحبة في السنين الضحوكة
قطعتني إيد مبروكة
وسواني عرق الضمير
عرق العافية الرحيمة
سواني شاب
بيفرش ضحكته علي صنعته
وينحت للحنين كفين
بيفتحوا ضلفتين صدري علي الأخر
ويحضنوا الملهوف
أنا قلب كبير مفتوح
وعتبتي ..
حجري المطلوق جناين
شبر مرمر وشبر ربيع
يساع من الحبايب ألف نخلة
يسقطوا للناس ونس
أنا..
بير الحنان البكر
وعلي كتفي ..
سبحة أرابيسك
عاشق في نور معشوق
حبة بتنطق إفتح وحبة تقول مفتوح
حبة بتنطق إفتح
وحبة تقول مفتوح
بسر ..
حبة شوق مدلوقين من فوق عيون محتاج
بسر..
خبتطين من كفوف خضرا لصبية حلال
مفتوح بسر ..
(فأما من أعطي وإتقي) من صوت
أبيض لشيخ وعارف .
عارف إن مفتاحي الحديد
غرقان في بحر الأمان
من يجي ألف وخمسميت موجة
وإن قبلتي معدولة علي مدد
(إنا فتحنا)
أنا ..
معني مجرد
وأوسع من هوي التأويل
معني وعاشق
وروحي مية ورد
متبعترة بشويش علي بوابة الحارة مهوس أملس علي الأعتاب وألاغيها
ب ألاغيها وأغني
وصوتي بيتكتك
وغنوتي بتدفي قلب البرد
عاشق بوسع خطايا
وعشقي بلوتي الناعمه
سكران بعشق العطايا
ومحسوب في الهوي أعمي.
أنا مش لحم ودم
أنا باب
وغاوي
يصبح عليا الفجر بالهنا
ويستفتح ويدعيلي
يكون الوسع دنيتي
ويكون البراح ديني
وأرخي سلسبيل دمعتي
وأسبل عيوني
وأدعيله
يكون الضل عزوته
ويكون الحنان قنديله
أنا مش لحم ودم
أنا باب
دخلني يا ما حزاني
ودمعهم سايح
من أول البسمله
والهم
طارح علي جبينهم شجر وارف
بيسمعوا حزنهم ويجودوا التسميع
دخلوا ..
كأنهم وجع مسنون
وخرجوا بعد دقة قلب
كما نهر الحليب فاير
بيرتلوا فرحهم ويجودوا الترتيل
من أول التنزيل
أنا
باب خشب
وكفين حديد فوق ضلوعي
وكل خنصر بيذوقه خاتم
بيدقوا علي الهادي
بيدقوا علي المكسوف
زي إبتسامة الرضا
وزي طعم السكوت
وعضمي من دقهم
هيمان مع التقاسيم
مداح
علي مقام الصبا والسماح
ولما يجي كف حرير
يستأذن من ضلوعي
أشبكه بخاتم
وأدخله
من قلبي
أنا مش باب خشب!
أنا
معني مجرد
وأوسع من هوي التأويل