»» ويتجدد اللقاء مع إبداعات أدباء وشعراء ومواهب أرض الكنانة،ومن آن لآخر نقطف مختارات من أعمالهم الأدبية..
ومن إبداعات الأديب الشاعر عيد حميدة، أهدي منصة المساء أون لاين قصيدته “بتكتب ليه’ ،نسجها بخيوط شعر العامة ،ننشرها عبر هذه السطور..
بتكتب ليه ؟!
هو أنت يا قلمى بتكتب ليه.
علشان توصف حزن كبير
جواك تداريه
وللا عشان بتفكر إنك
قادر تحكى تشكى عذابك
وانت لوحدك حاسس بيه
بتقول إيه ؟!
بتفضفض بس مع الأوراق
وبتحكى ساعات حب وأشواق
طب إيه فايدة إنك تحكى..
والأوراق بتقوللك إيه ؟
طبعا لا هتتكلم ولا هترد عليك
عارف ليه ؟!
علشان انت كلام مكتوم
تكتب ٱه ترسم ضحكه ف يوم معلوم
أهو بتحاول ودا مش عيب
تحكى وتشكى نواح ونحيب
بس حقيقى برافو عليك
إنك لاقى اللى تفضفض له
هو صحيح سامع شكواك
بس ماهوش هيرد عليك
زى كتير عايشين في الدنيا
كل حياتهم يحسدوا فيك
يرموا هموم الدنيا عليك
ولافيش لحظه يقربوا منك
يمسحوا دمع كتير ف عنيك
ولا يتمنوا يشوفوا الدنيا
فارده جناح الشوق حواليك
وان فكرت تعاتب واحد
يزعل منك ويبكيك
كل الحبر يا قلمى بتكتب بيه
عمره ما يوصف شئ جوايا
فرح ونوحى وكل أسايا
حتى اذا كان البحر مدادك
زى مارب الكون بيقول
ووراه ميه بيبعتوا ليه
عمره مايقدر يوصف شيئ
عمره مايمسح لحظة ضيق
وبرغم حروفك رغم كلامك
مش سامعين لك صوت
يمكن زى ماكل الناس بتقول
إن سكوتك أغلى مافيك
صمتك دايما هو كلامك
برضو سكوتك هو سلامك
لكن مين هيقدر إنك
مش مستحمل كل حروفك
لما بتكتب يوم عن واحد
كاره كل الخير للناس
ناسى الود وفاكر إنه
رمز لكل الذوق وأساس
انت أمانه وكل كلامك
للمخاليق بتنور ليهم
كل حياتهم
كل ماليهم
🍂
يذكر أن الشاعر عيد حميدة له أكثر من ثلاثة دواوين مخطوطة تحت الطبع من الشعر العامى والعمودى والحر،وأكثر من ثلاثة كتب تحت الطبع لبعض مانشر له من المقالات والدراسات النقدية.
