كاس العالم تسعين
القبارى
مستوصف شعبى
الماتش بيبدأ
دكتور مش فاضي
يخيط إيد الواد اللى بيصرخ دم
تقدر تلمح قريفته
ف طرف صباعى المتشوه
الدور التالت شارع تلتين
نُص الليل
واقف ف البلكونة و متوتر
رايح جاى
مستنى يشوف أم ضفاير
بتنشر قلبه النى
الشلة اياها
سامى وهيثم ووسام وولاء
والقعدة لحد الفجر
والضحك اللى من القلب
من كتر الضحك تقريبا خلصناه
أسفلت العجمى بيتعاطف
مع شاب بيبرم طول اليوم
والآخر كيسة معلش
زنزانة ال vip
فيها نفوذ وفلوس وحشيش
البقشيش إجبارى
والشيش … باصص ع الضلمة
حتى ف عز الضهر
وطموحك
كل طموحك
نمرة تكون ملاكى
تشيل الجتة اللى الفكر بينهش فيها
اللحم اللى بيسقط م الوش كسوف
كل اما اتخيل دمعة أمى
عشرين عشرين
كِنزى بترسم مركب رايحه البر التانى
سواق المركب يستنى اما الكل ينام
يخرج من قلب اللوحة
ويخرم ضهر المركب
ويصلى كتير ويعيط ويدوب
بيحاول إنه يهدى السرعة
بيحاول يهرب من مكتوب
ناقد بيحاول يوجد رابط بين العلاقات
مش قادر يصبر
وبيخرج فاضى الإيد
قهوة طلخاوى ف عز الضهر
يوم الأربع
أربع مرات في الشهر
أول درس ف ورشة أيمن صادق
إكتب إحساسك
النص بيسكن فيك
يمكن قبل ما تيجى الدنيا
و بيخرج على هيئة
حصة إملا
