جالك قلب تلم صورنا
من فوق كل حيطان البيت
فاكر لما انا وانت سَهرنا
شْفنا الضحكه ف وش قمرنا
جي دلوقتي تلم صورنا
ليه علي حقي جنيت وقسيت ؟!
طب فين صورة كتب كتابنا
وانا وياك وورانا عزولنا
. بعيون خوفي كنت بشوفه
قلبي كان بيموت من خوفه
وهو يقول علي قلبي عبيط
فين وانا بحضن بالحنيه
جوه عيونك احلي صبيه
فين وانا فارده رموشي عشانك
تمشي عليها
وأمسح بعدك اي قسيه
فين تصاويرنا ف إيدنا ولادنا
اطفال تشبه للكتاكيت
قلبها زي القطن الابيض
جوه عيونها تقول حواديت
كنت ف عز البرد احضنهم
بس واحس إني ادفيت
رجَّعْ ليا صورنا /ألضمهم
جوه ف قلبي بأبره وخيط
خيط بيخيط علي احلامي
ويغرقني في حلم غويط
دول مش بس الذكري ، وعدت
دول من اول ما اتوعيت
شافوا ملامح عمرى بحاله
ليل وبيبكي علي مواله
اه لو تعرف ان صورنا
… كات مرايات لبنات افكارنا
بفيونكات كات بتفكرنا
ان سنين العمر بتجري
واحنا بيجري ورانا قدرنا
