ويتواصل اللقاء مع إبداعات أدباء ومواهب أبناء أرض الكنانة..وتحت عنوان “خربشات المسحراتي” تنشر بوابة الجمهورية والمساء أون لاين غيضا من ابداعات الشاعر أحمد فاروق بيضون الرمضانية عبر السطور التالية.. 🌙
خربشات المسحراتي
مسحراتي والغنوة كيفي
والطيبة طبعي والذوق رغيفي
إصحي يا فاطنة وانتِ يا فيفي
الدنيا حلوة فِشتاي وصيفي
رمضان أهو جانا بحارات وريفي
مليان جوايز لروقة وعفيفي
وانت يا شاطر وانتي يا وَليفي
صحي العيال وبلاها تُوفي
حبة رُطب ولفَاليفي
المدفع يلالي.. هاتولي شيفي
إصحَ يا مسرور وجهز لي سيفي
الخلق نايمة.. مقطَّعة مجاديفي
صحي الجيران.. الديك بيدن
وبيغازل رفَاريفي
اصح يا نايم وحِّد الرزَّاق
رمضااااان كرييييييم…
🌙
مسحراتي وحلمي أطير
فنسمة ليل وطلة عبير
الدنيا فلة وقراقير
برسم أماني بتباشير
والطفل يضحك والغفير
طقطوقتي أحلى مالفوازير
إصحى يا هيمة.. إصحي يا غدير
وانت يا سعيد وانت يا هدير
صحوا القَمامير….
إصحى يا نايم وحد الرزاق..
رمضااااان كرييييييم
🌙
مسحراتي والليل طويل
درويش وماسك مبخرة
وأديني بسعى ومافيش بديل
قابلتني حتة سُكرة
ضحكتلي.. قالت: يا عَم شِيل
الطبلة.. كفاياك منظَرة!
يا مطرة رخي فوق جميل
ده هوايته حكمة معطَّرة..
رديت وقلت أصل الكلام
الطير بيغزِل سندَرة
تحتيها رقِّة لوجي وأسيل
مريَمنا وبوسي وشدَن مِتمختره
دنيانا بتنادي جودي ونادين
أصل الغِواية الغندَره
أيوه يا عالمنا التقيل
سيبوني ألف من سيدي بشر للمندَرة
ده أنا صوتي جايب من دمياط للقاهرة
اصح يا نايم وحِّد الرزاق
رمضان كررريم يا متنور ومتنوَّره.
🌙
مسحراتي منقراتي
في البلاد سوااااح
لفيت كتير وياما شوفت
وفي الميدان وقت الأدان.. ومن زمان
حبِّة شقاوة.. ومرازيَّه.. طبلَه وجنان
اصحى يا نايم.. اصحى
وبعوده يا رمضان…
مسحرَّاتي عاشق وهايم
تلاقيني صايم
في الحب نغَمي سارح وعايم
في الفلوكَه
وانتَ يا حُوكَه يا عازف الدلُّوكه
أوعاك تروَّح من غير ما تصحي دُولا ودُوكا
ولاَّ تلاقي دربوكِّة الدنبوكَه
اصحى يا نايم.. اصحى
رمضان كريم…
مسحراتي وديْدبان
لفّيت كتير والحلوْ بان
والضحك صاحبي.. وكان اللي كان
وبلاش تخلِّي م الأحزان خزَّان
أوعاك تشوفني بَهلوان
دي مصر أحلى.. لمّة جيران
وعيال بتضوي فوانيس.. تنوّر بيبان
عشانك إنت يا ماريا.. السمسمية مع الكمان
والطبلَة ترسم شكل المكان
إصحى يا عابد.. إصحي يا حنان
رمضااان كريم…
🌙
مسحراتي وصاحب جريدة
مليانة أخبار عن ناس بعيدة
في بلاد بتعشق الزغرودة
وفيه خلق أفراحها ترويدة
إصحَ يا عمر ويا ست فريدة
رمضان بيبعت أفراح جديدة
وانت يا بودي قوم صحي روقَة
ونادي لحسام وسحر وطروقة
الكل نايم.. عاوزلُه فوقة
الدنيا حلوة واللمة أحلى
اصحابي من زمان ليهم شوقة
إصح يا نايم وحد الرزاق
في لحظة.. ولو كانت مسروقة
رمضااااان كرييييييم.
🌙
