»»
ويتجدد اللقاء مع إبداعات أدباء ومواهب أبناء أرض الكنانة وتنشر بوابة “الجمهورية والمساء أون لاين” أحدث إبداعات الكاتبة الأديب سميرة أرميا الموسومة بـ “بداية بطل”..
🍂
مصطفي شاب في مقتبل عمره يعيش في محافظة الشرقية كانت أحلامه وطموحاته تسبق سنه وإمكاناته فهو الآن يقارب سن الثامنة عشر وهو يطمع أن يخرج خارج البلاد مثل أبناء قريته ويخطط لجمع المال حتى يركب أحد مراكب الموت ولعل هذه المراكب التي يحفظها الموت ذاته تكون هي جسر الحياة التي تعطيه قبلة الحياة
المأساة هنا ليس في فكر مصطفي وحده بل هو فكر والده أبو القمصان الذي قدم من قبل ثلاث شباب في ريعانهم لم يذق أحد فيهم طعم الفرح أو السعادة . كانوا هم أيضا يطمحون في السفر إلى أوروبا..
وقد ساعدهم أبو القمصان على ذلك وكل مرة يخطف الموت الحلم والحالم ويعود الحلم يبعث من جديد على يد أحد الأولاد وها هو مصطفى هو أخر حلم أما أن يحقق ما اخفق فيه إخوته أو يعوض عنهم بالمال
هذا هو تفكير أبو القمصان الذي لم يتعظ حينما جعل القدر من إسمه قمصان لموت أبنائه
أتمّ مصطفى السن المطلوب وأتم أبو القمصان المبلغ المطلوب الذي وصل مائة الف جنيهًا واتجها إلى محافظة الإسكندرية واتفق مع أحد السماسرة الجدد
..هو يعرف المكان جيدا .
وصل أبوالقمصان ومصطفى إلى عشة على شاطيء الاسكندرية واتخذ لهما موضعا وسط عشرات الشباب .
كل منهم يحمل حقيبة صغيرة بها أهم الضروريات
نظر أبو القمصان إلى ولده الذي أصبح وحيدا وفي عينيه نظرة حائرة مضطربة من نظرة عامل الشاي إليه
نظر إليه عامل الشاي نظرة احتقار الولد مقابل المال
ماذا يعطي الإنسان عوضا عن ولده
هل يوجد أهم من الإنسانية ! ولكي يهرب أبو القمصان من نظرات عادل عامل الشاي باغته بالسؤال
-ازيك يا عادل أخبارك ايه؟
-تمام يا حاج في نعمة
-إلا قولي أنت ليه مفكرتش تروح مع فوج من الأفواج دي
– فكرت كتير بس عندي أربع أخوات أسيبهم على مين؟!
– دا أنت لو عديت هخليهم تمام التمام
– وافرض موت أو وصلت واترحلت تاني هيكون كسبت ايه وكمان ممعييش تمن التذكرة
– لا دي محلوله حدانا واحد في البلد بيدي فلوس للموضوع ده
– طبعا هياخده الطاق طاقين
-تلاته لو نجحت واتنين لو فشل
– طيب لو فشلت هاجيب منين دا تفكير مش صح خالص
– يا راجل سيبها على الله
– ما أنا على الله و رب هنا رب هناك ولا الغريب سره باتع
-أنت عارف هناك العملة تعمل كام هنا؟
– تعمل زي ما تعمل أنا هنا وسط أهلي دفيان في حضن أمي وأخواتي وأهل الحتة
– الدنيا بقت صعبة قوي يا عادل
-مش أصعب من هناك
-البلد كمان محتاجة عملة صعبة ساعد بلدك يا أخي..
– بلدي محتاجة تكون منتجة تصدر إنتاج ونجاب العملة واحنا هنا
-أنت باين مخك على قدك
-فعلا يا حاج سيبني بقى لأكل عيشي
ودع أبو القمصان مصطفى وهم بالرحيل مع باقي المودعين
وبات الرجال وهم جلوس القرفصاء يميل أحدهم على الآخر وبات مصطفى بين رجل ثلاثيني من محافظة الدقهلية واسمه غنيم وبين رجل من محافظة المنوفية واسمه أنور في العقد الثالث من عمره..
قام جميعهم من النوم مع آذان الفجر وافترش بعضهم بعضا من ملابسهم وأقاموا صلاة الفجر جماعة .
وحضر عادل السندوتشات وتناول البعض الفطور وأشار على الآخرين بالفطور لأن الأيام طويلة والرحلة عشوائية ولا يعلم ميعادها سوى الله عز وجل ربما بعد لحظات أو بعد أسبوع أو عشرة أيام ..
تنفس الرجال الصعداء وجلس كل رجل فيهم يفكر لكن كأنهم جميعا مرميون ومنسيون داخل سديم عظيم لا تستطيع عقولهم فهم ما يجري حولهم ..خيالهم فراغ..ذكرياتهم تلاشت واللحظة الحاضرة غير قادرين على استيعابها .. تقرب من مصطفي رجل آخر في العقد الرابع من عمره
-كيفك يا بطل ؟
-بخير
-الحقيقة يا خوي محدش فينا بخير
-منين النجم ؟
-الأقصر
-الأقصر !
-مالك مستغرب ليه؟
– أصل الأقصر بلد سواح وكده..
-فعلا بلد سواح وعندي لغات
-أومال هاجج منها ليه؟
– زي ما أنت هاجج ولا تكونش مغصوب يا ولد؟
-لا مش مغصوب ولا حاجة دا حلم من زمان أسافر وأبعت لأبويا يشتري أرض و يبني عمارة
عادل: اتفضل الشاي يا مصطفي وشاي لبلدينا
عادل (موجِّهًا كلامه لمصطفى ):أرض ايه مافيش أوسع من الأراضي في مصر
العلمين والوادي فيها أراضي بالعبيط الا اسم الكريم ايه؟
-شوادفي
أحد الرجال
-ألا هو فيه حد لسه بيسمى الأسماء دي!
مصطفي :وانت مالك باللي يسمى ولا مايسميش
شوادفي:خبرك ايه انت عبيط اياك.
عادل :بس بس صلوا على النبي وصفوا النية علشان رحلتكم طويلة وسودة
رجل: يا عم تفاءلوا بالخير تجدوه
عادل :طيب يا حبيبي تفائل وأما نشوف.
مصطفى :يعني ايه؟!
عادل : ما بلاش انته ما أنت عارف الفولة واللي فيها
شوادفي :فيها ايه يعني؟
عادل :فيها كل خير.
الرجل :ما كله خير من ربنا والموت خير برضو
شوادفي أنت تاني؟
عادل :خلاص يا بلدينا.. عندي دي
ألا اسمك ايه يا شبح ومنين
-خالد من كفر الشيخ
عادل:بتوع كفر الشيخ وعيين قوي.. ايه اللي حدفك على المر
خالد : إللي أمر منه
رجل :جري ايه يا رجاله شوية هدوء
مصطفى :وحضرتك مين
-والي من الفيوم
خالد :والي.. والي ايه الاسماء دي!
شوادفي:وانت مال أهلك
والي :بس بس اهدى يا عم شوادفي.. بشوقه يا عم ..فيه ناس كده غاوية تنا
قر في الناس
خالد :أناقر ؟! شايفني فرخة فيومي قدامك
عادل :بس اهدوا شوية ..ايه الدفعة دي .اراهن إن البوليس هياخدكم كلكم
خالد : وأنت ؟!
عادل: أنا بقدم خدمة
خالد: خدمة ! لا والله أنت أول واحد هيعتبروك من السماسرة
شوادفي : جماعة تفاءلوا بالخير
رجل : والخير ده هياجي منين؟
عادل : ومين البرنس ؟
– التوني بخيت من أسيوط
خالد : يا دي الستينات اللي وقعت فيها أنا
عادل :الا اسم حضرتك كامل ايه يا مستر المساطر كلها.
خالد : خالد السبيعي شلبي.
عادل- يعني ماشوفناش تامر ونادر ولا حتي وحيد ما اسمك من القرن التسعتاشر اهوه
خالد : ماله اسمي؟
رجل :ممالوش بس ابقي قيس الكلام عليك قبل ما تطلعه لحد.
خالد : ومين الكنج
-أنور من الفيوم
خالد: وقصدك ايه يعني يا أنور ؟
عادل:مايقصدش اتهدوا بقى..
رجل يشاور : خد يا واد
عادل: ايه واد دي.. اسمي عادل
– معلش خد يا استاذ عادل
عادل:نعمين
الرجل : هات تلت سندويشات
عادل :عاوزهم جبنة بيض ..
-أي حاجة على ذوقك
عادل: يا عم ذوق ايه أنت بتحب ايه؟
الرجل : أي حاجة
عادل: قول يا عم بتحب ايه تأكله أخر حاجة تذوقها من بلدك يا ..اسمك ايه
– توفيق الخراشي من البحيرة
خالد :الخراشي (يضحك بقوة ) ..
توفيق: بتقول ايه أنت ..طفل صغير بتتنمر على الناس اهدى بقى خلي الرحلة تعدي بخير .
عادل :مايهمكش منه يا عم توفيق بس عندي سؤال (ينتهى من السندوتشات ويقدمها له على صينية صغيرة
توفيق :قول يا عم عادل
عادل :راجل في هدوءك ورجاحة عقلك مسافر ليه ؟
توفيق: دي قصة طويلة.. أحكيلك عليها بعدين
عادل: بعدين ايه يا راجل هو فيه بعدين!
توفيق: ما دامت الأرض باقية فيه بعدين
عادل: هي الأرض باقية احنا اللي زائلون
توفيق : معاك حساب فيس
عادل: آه اهوه (يخرج التليفون ويريه لتوفيق وهو يهم بقضم السندوتش يرى الحساب ويقضم من السندوتش)
توفيق : أول ما أوصل هبعت لك طلب صداقة ولا أقولك هبعتلك دلوقتي .
رجل: فاضيين ورايقين
توفيق: وأنت ايه اللي معكرك يا… اسم الكريم ايه؟
-إسماعيل العسال من الغربية
-توفيق: ومتعكر ليه يا سمعة؟
خالد :وسمعتك ايه بقي؟ حلوة ولا بطالة هههه
إسماعيل :دا المفروض يسموك ظريف
عادل :المفروض كانوا سموه وريحونا
خالد : وأنت تعبان لي فيه ايه يا عم عادل
عادل :أبداً أنا واخد على كده أنا بس صعبان علي الغلابة دول خايف عليهم من خفة دمك
خالد :مال دمي..
رجل: يا جماعة الراجل شايف الدنيا كآبة في كآبة فبيحاول يضحك معاكم علشان تفكوا
عادل : وأنت بقي المحامي بتاعه .. اسم حضرتك ايه اسمالله عليك يا عبقري
-كمال الدين موسى من القليوبية
عادل : أهلا بيك يابو كمال.
رجل : صدعوتنا اسكتوا بقى
عادل : يا جماعة الخير اللي عاوز يتكلم ويفك تعالوا في عشة تانية فاضية بعيدة عن الناس دي.
بدأ الرجال في التسرب من العشة واحد تلو الآخر ..
ووجدوا في العشة الأخرى ملاذا وحولوا ساعات الانتظار اللعينة الى حفل تعارف يملؤه الصخب وتعلوه الضحكات .
ومر اليوم الأول والثاني والثالث لأن دورية خفر السواحل يقظة وفي اليوم الرابع هجمت نسور الشرطة المصرية على العشة الأولى وأخذوا جميع من فيها ..وونجا رجال العشة الثانية .
وعندما خرج الرجال من العشة الثانية ليسطلعوا الأمر أشار لهم عادل بالدخول وعدم الحركة أو الكلام.
رحل البوليس بالآخرين وأخذ معه حلم العشرة رجال المتبقية.
جلس الرجال على الأرض ليس لديهم طاقة يرفعون كوب الشاى إلى افواههم
ماذا سيفعلون ؟
وكيف يعودون لقراهم وبيوتهم؟! وماذا سيقولون لذويهم؟ ( منهم فكر بالانتحار )
جاء عادل وطلبوا نصيحته وأهدى إليهم فكرة ..
عادل : لماذا لا تكون الهجرة داخلية
خالد :الفكرة دي أنا شوفتها فين قبل كده؟
عادل :دا مسلسل لمحمد صبحي قديم
توفيق: أيوه متهيألي اسمه سنبل
مصطفي: أيوه أنا شفت المسلسل ده تقصد يا أستاذ عادل نقلده.
كمال الدين :دي فكرة هايلة
إسماعيل :متهيالي السمسار أخد نص المبلغ يعني كل واحد فينا معاه ٢٥ الف
واحنا عشرة يعني معانا ربع مليون جنية
أنور:وكل واحد معاه عملة أجنبية بقيمة ٥٠الف تاني في جيبه يعني نص مليون كمان
عادل : طيب هتجيبوا الفلوس من أهاليكم إزاي ؟
كمال:هنخليهم يحولوا لك .. أنت معاك أي محفظة الكترونية.
عادل : للأسف لا
مصطفى :روح أعمل.. بسيطة يعني
إسماعيل : كده معانا مليون إلا ربع
خالد : دول ميأجروش أرض تنفع مشروع
عادل :أنا عندي أرض في النوبارية ٥.. فدادين ومأجرهم وأخر الإيجار الأسبوع ده.
غنيم : ادخل معانا بالأرض واحنا بالفلوس والمجهود ،وإذا احتجنا فلوس في النص نبعت ناخد من أهالينا بحجة أن الحال مش ماشي
مصطفي: وعم عادل يكون همزة الوصل بينا وبين أهالينا
شوادفي:وهم كيف هيوثقوا فيه؟
عادل : منكم كل واحد هيقولي على أمارة بينه وبين أهله .
التوني :طيب هنعمل ايه في الأرض.. الأرض علشان تدي محتاجة مصاريف ياما
عادل :اللي مأجر الأرض منظمها و زارع فيها أنواع فاكهة كتير
الشوادفي:كده مش هيرضي يفوتها
عادل: هو كدا كدا مسافر برا مصر أصلها كانت وش السعد عليه اشترى بره مصر كام مصنع على كام مزرعة.
التوني :دا ربنا مسهلها أهو ..
غنيم :طيب أنا عندي فكرة
إسماعيل : قول
غنيم : نعملها زي مزرعة سياحية
مصطفى : ازاي مش فاهم؟
أنور: أقولكم
هما خمس فدادين نستغني عن فدان نعمل فيه ترعة صغيرة ونحط فيها بط ووز ونعمل مطعم فرعوني مفتوح ..
توني: فكرة هايلة يا أنور، وليه ما تحطش بيئات ريفية صعيدية ونوبية وسيناوية وغيرها..
الشوادفي: كده أنت عاوز مش أقل من “٢٠فدان”.
عادل: معروض عليا أبدل المزرعة بعشرين فدان في الظهير الصحراوي
بس هنبدأ من الأول
والي : وافق بس بشرط ننقل شجر من مزرعتك واحدة من كل نوع
الشوادفي: وده هيتم كيف ؟
والي : دا شغلي
غنيم : أنا بقى همصمم المزرعة وأماكن الجلوس وهعمل التكيات بنفسي وعندي حد صاحب معمل فخار اجيبه يعمل ورش عمل
كمال الدين :وأنا مسئول اطلعلك مية ارتوازي من أي حتة في مصر دا شغلي
توفيق : وأنا غاوي طيور و عارف اجيبها منين .
فراخ هندي وفرعوني ورومي أبيض وأسود وسلاسة الديوك النقارة
عادل :دي بتاعك المراهنات دي صح:
توفيق: صح
شوادفي : أنا بقي هاوي تربية أغنام والسلالات النادرة اللي بترمي لحم كتير وأعرف أجيبها منين
عادل: تمام جدا
خالد:أنا بقى هعمل إعلانات على النت بمكان المزرعة وأعرف الناس إزاي توصل لها ومسئول عن الحجوزات ومقرات الاقامة لنا وخلافة
عادل: وأنا عندي ماما وجيرانها شاطرين في الخبيز الفلاحي بأنواعه والفطير المشلتت وخلافة
خالد: بالنسبة للورش ممكن نعمل إتفاق مع ورش الفخار وورش تعشيق زجاج وصناعة سلال وغيرها من الحرف اليدوية
عادل: كويس جدا المنطقة عندي فيها شباب وبنات زي الفل ونجاب حد يدرب وناخد منهم كوادر
أنور : مكن أضيف مزرعة لجميع أنواع الورود.
عادل: ايه رأيكم ؟
الرجال : ممكن طبعا
كمال الدين : أنا عندي بيت صغير مأجره هابيعه.
خالد : أحنا كدا لازمنا محامي يكتب عقد
غنيم: أنا محامي أكتب العقود ونشوف محامي هنا نوثقها.
مصطفي : الفاتحة يا رجالة على الأمانة وحفظ السر ويارب أهالينا ما تعرف أننا هنا وأن الإتحاد
شوادفي :لا تخف يا ابن عمي الإتحاد سره باتع.
قرأوا الفاتحة
خالد : محدش سمع صوتك يا عم عادل
أنا قرأت أبانا الذي في سري.
ضحك الرجال .. وأخذهم عادل عاينوا المزرعة وحددوا الأشجار وما يلزمهم وأكمل عادل الاتفاق وأخذوا 20 فدان في الظهير الصحراوي وما مر العام حتى باع كلا من كان عنده شيء يستغنى عنه بحجة أنهم في ضيقة وفي حالة كرب وهرب دائم من السلطات المحلية واختاروا اسم المزرعة ” الإتحاد ” ..
ومر عام ونصف ،وبدأت المزرعة تجذب أعدادا كبيرة من الزوار ، وبعد ثلاث سنوات غطت جميع التكاليف وبدأت تعم بالخير على الجميع وبدأ الرجال في إرسال النقود لذويهم وفجأة أصبحوا يتصدرون عناوين الأخبار لجمال التجربة وتكرارها وحدث ما كان يخشون منه معرفة أهاليهم أنهم مازالوا في مصر وأقساط الأرض التي لم تدفع من المالك والأصلي ،ومهددين بسحب المزرعة!..
