قررت هويدا عبد الناصر ميسرة مجموعات الإدخار والإقراض بالمجلس القومي للمرأة انها تستغل خبراتها اللي بتنقلها لسيدات قرية بني إبراهيم بمحافظة أسيوط في برنامج “تحويشة” وتغرس جوا أطفال كل سيدة منهم أجمل صور التعاون والمشاركة والمسؤولية وروح الفريق ومن هنا بدأت مع أطفالهم رحلة “تحويشة الأطفال”، وعرفتهم على معاني الإدخار، الاطفال حطوا هدف قدام عينيهم وكانوا عاوزين يوفروا لنفسهم كل الاحتياجات الخاصة بالدراسة قبل بداية السنة الدراسية ونجحوا خلال ٤ شهور، وقدروا يجمعوا اكتر من ١٥ ألف جنيه عن طريق تحديد السهم ب٥ جنيه وادخاره يومياً، تحقيق حلمهم كان ورا تعلم وصبر وتعاون ومشاركة.
الوعي مسؤولية وعشان نبني جيل واعي وقادر يعرف اولي خطواته السليمة عشان يحقق أهدافه ويبني احلامه، لازم كل فرد يستغل خبراته وينشرها في محيطه ويعرف انه بيساهم في بناء قدرات كل طفل بيتعلم وبيشارك، وبيكون سبب في تحسين مستقبل المجتمع.
وجه المجلس القومي الشكر للميسرة هويدا عبد الناصر انها جزء كبير من ترسيخ قيم مهمة مع أطفالنا اللي بدأوا رحلة “تحويشة” وهيكملوها بوعى وذكاء وحرفية.
برنامج “تحويشة” مجموعات الإدخار والإقراض الرقمي بينفذه المجلس القومي للمرأة تحت برنامج الشمول المالي ضمن المشروع القومي لتنمية الأسرة المصرية.
