ويتجدد اللقاء مع إبداعات مواهب وأدباء أبناء أرض الكنانة ..وضيفنا في هذه السطور الأديب الشاعرعيد حميدة ،والذي أهدي بوابة الجمهورية والمساء أون لاين قصيدته “أرض الفيروز”، ابتهاجا بذكريات النصر وعيد تحرير سيناء، ننشرها عبر هذه السطور..
🍂
أرض الفيروز
يا أرض سينا افرحى
رملك دهب وكنوز
وزمان قالوها هنا
أرضك بقت فيروز
مرت عليكى المحن
كان فيه عشم بالفوز
لكن صلابة ولادك
ردوا العدو المهزوز
ومابين عشيه وضحا
دحروا العدو المنبوذ
اسمك منور ياغاليه
نلقاه منين مانعوز
فى ٱيات كتاب ربنا
والعشق فيها يجوز
داب فى هواها الصبى
وعشقها كل عجوز
أجدادنا كتبوا التاريخ
والرمح كان مغروز
فى قلوب جنود العدو
“أحمس”حضر منصور
ومين هينسى “قطز ”
عايش معانا دهور
وحد صفوفه وحلف
مايعيش هنا مغرور
بإديه هيكتب نهايته
ويموت ذليل مدحور
سينا العزيزه اسعدى
فيكى الأمل مبدور
ابنك فداكى بحياته
وهدم بعزمه السور
وكتب تاريخ أمته
والحق عاد منصور
أقسم بسورة “التين ”
ومعاها سورة”الطور”
ماينول عدوك فرح
ولا يلقا فيكى النور
لو كان ف يوم افتكر
احنا علينا الدور
هيلاقى كل الوطن
يهتف في وشه يغور
وبدل مايفرح ساعتها
هيموت ذليل مكسور
وتاريخ بلدنا المجيد
مكتوب بعزم أكيد
عاشت بلادنا الأبيه
وبدم كل شهيد
“أكتوبر”اللى شهد
عودة كفاح ونشيد
يحكى بطولة بلد
كتب التاريخ بالإيد
“إبريل”شطب كدبته
ورسم لنا التجديد
وف خمسه فوق عشرين
كان الأمل بيزيد
وعلم بلدنا ارتفع
رفرف وهو سعيد
قصة شهامة وطن
بسياسته بالتأكيد
رجعت لحضن الوطن
بالنصر والتشييد
وهتفنا من قلبنا
مصر النهاردا ف عيد
