طير ورفرف..
بس اوعى جناحك المكسور يعوق الرفرفه
أنت فارق مش خفيف..
أنت بتغنى برواقه
وطيف شفيف
طير وروح لبلاد بعيده لم رأت خطوة عبيد
واقطف الشمس العنيدة وازرع الورد البديل
تلقى احلامك سعيدة..
واصله دايما للوريد
…..
طير وغنى..
للتمنى..
خلى صوتك يعلا يعلا يوصل الفجر الجديد..
لجل نهدى الدنيا بيك وبغناك الليل يطيب
يطرد الزرع الشيطانى اللى وافد والغريب
آه يا وطنى..
ياللى نابت جوا منى
شجرة الروح اللى شاغله كل ذره من كيانى
واخده منى حته غاليه..
هى أجمل شيء في بالى..
…..
طير وزقزق..
زقزقاتك لحن فنك..
حته منك..
اشدو بيها لجل يكبر جيل ما يعرفش النفاق.. أصله فاق قبل ما تبقى فى فراق..
خطوتك زى البراق..
مدها توصله حالا..
يلا غنى.. عيد غناك
لجل تصفو روحه جدا..
لجل يصحى الديك ويدن
فوق جدار الصبح طارح خير وضل
آه يا كل المحتاجين لاحساس أمان..
ولا ورده شوق وفل..
…..
طير يا طيرى..
واوعى يوم تشرد هناك
اوعى تنسي فضل خيرى..
تقفل الشباك وراك
قلتى بتنز ميه..
يالا اشرب منها مزمز ..
وقتها نسمع غناك..
لجل تصحى الدنيا بيه..
اضرب جناحك ف الهوا..
شق الطريق اللى انت فيه
…..
طير يا طيرى..
طير ورفرف
ولا هفهف هفهفه
فوق جناين خضرتك
بس اوعى جناحك المكسور يعوق الرفرفه.
