ويتجدد اللقاء مع المعين الصافي لإبداعات ومواهب أبناء أرض الكنانة، وضيفنا في هذه السطور الأديب الشاعر عيد حميدة ،والذي أهدي بوابة الجمهورية والمساء أون لاين قصيدته ،”يوم الفرح والنور“، احتفاء بذكري نصر أكتوبر المجيد،يوم العزة والكرامة.
🍂
يوم الفرح والنور
ورجعت تانى بالأمل
يوم الفرح والنور
يوم كل مصرى حن له
يرجع تاريخ البلد منصور
ويشوف وشوش البلد كلها
فرحانه تهتف بقلب غيور
كان فين شعاعك يابطل
خللى الهزيمة تغور
راجعين لحضنك ياوطن
و النصر كان مسطور
وحياة كتاب ربنا
والحق فيه مذكور
سينا الحبيبه إسمها
والتين وجبل الطور
و المولى بيقول لنا
لازم نهد السور
سور الهزيمه اللى اترسم
بإدين عدو مغرور
كان فاكر ان الملحمه
نشوة صياح مهجور
أو زرع مات وانتهى
والأرض كانت بور
لكن شجاعة جندنا
رفعت رقابنا دهور
عايشين بنهتف للوطن
والشعب فيه مستور
محروس وشايف همته
عاليه ف طبق بنور
والنور يلالى فى السما
حواليه نجوم بتدور
هنعيش نسبح ربنا
نحلف بسورة”النور”
نحمى حماك ياوطن
ونزيح غشاوة الجور
وبحڨ نصرة ربنا
لجنودنا يوم”كيبور”
يوم الكرامة والأمل
يوم العدو المدحور
الكل شاهد ياوطن
والحق كان منثور
رجعت حدودنا وأرضنا
والعزم حاضر والجزاء مشكور
وعدو أمتنا انكسر
و اختار يعيش مقهور
“بارليف” خلاص اندحر
والنصر صار محفور
يوم ما التاريخ انتفض
كان يوم فرح وعبور
يوم ما العدو انتهى
خذلان حزين مكسور
راجع وشايل خزيته
وبچامة نوع”كستور”.
🍂
