شايفاك على طول كده متضايق
مسحوب من روحك رايح فين
و الحزن عليك توب مش لايق
وأنت اللي بديت والعين بالعين
نواياك ليه دايما مش صافية
وبتظهر قبل ما تخفيها
واهي حطت رجليها الحافية
على أول كدبة تخطيها
مالقتش ف قلبك موجة راسية
وأنا قلبي خلاص مش متحمل
يحضن في مشاعر بالعافية
وغرام كداب وبيتجمل
دي النبضة ف قلبك كات ساكنة
وأنت اللي قسيت أيوة عليها
غيرت ف قلبك 100 لكنة
فياريتك تهجر معانيها
علشان القلب تعب منك
وانت بتتغير ع الوشين
مين تاني هايقدر يأمنلك
ويشيلك جوه ف نن العين
خليت ف ملامحي خطوط قفشة
تشبه للعدسة المكسورة
ومشاعر قلبي بقت ناشفة
ف الاصل بتظهر والصورة
ليه الحب ف قلبك مش صادق
وبكدبك كنت تشوه فيه
ده انا روحي كانت بتصادف
ناس دايما عايشة بتبكي عليه
وانت المتغرب عن روحك
مش عارف تشكي وتتكلم
ولا حتى تسمع صوت بوحك
يمكن من غلطك تتعلم
فضفض مع روحك لو ثانية
وبلاش توهمها بأوجاعك
أو تلعب دور تاني ضحية
وتقول اتفقوا على خداعك
وأنت اللى بتخدع معاليها
من غير تفكير كان او إحساس
بالقسوة خلاص راح تعميها
وتعيش وياها بدون إنجاز
ومسيرك تيجي وتسألني
إزاي إتهد ف غمضة عين
كل اللي بنيته زمان مني
دلوقتي هاتبني الجي منين
