“كلام حادق” إطلالة أدبية بطعم لاذع، لكنها بديعة ومتميزة كما عودنا الشاعر الكبير العميد عبدالله الهادي الصقر أحد أبطال حرب أكتوبر، حيث يموج بنا في أفق الحياة،راصدا لأنماط وصنوف سلبية .. فعلا وقولا واعتقادا.
إنه توصيف رمزي للواقع عبر رحلة سياحة أدبية جادة في دفتر أحوال نفوس البشر ، ينسجها بحروف منمقة تقطر حزنا وألما ووجعا .. يقول فيها: :
(( كلام حادق ))
لما التاريخ ندفنه
ويأبنه المجهول
غول العداوه
هينهش مجدنا العالى
وامامعالى الأذيه
تظلم المقتول
هيطول حصار الأصول
فى يمينى وشمالى
طول الليالى
خيالى م الغتا بينوح
مش لاقى مينا
ترسينا على المسموح
والصبر لحظة
وضوح الرؤيا يسألنى
ع اللى عملنى جمل
واندار عمل جمال
على كل حال الحياة
يوم ليك ويوم ليه
شر البليه طفح
شنطح شطح بيينا
فينا إللى فينا
وكل نفوسنا حمضانه
ومافيش حصانه
ولو بالغش تهدينا
ريحة حياتنا عمتنا
وتاهت السيره
تاج الجزيره
مافكش رهن أسامينا
طول علينا السفر
والغربه قد القول
نول السعاده بيغزل
بس مش لينا
حوالينا حالو
حزينه ودمعها بقشيش
ومافيش فى كيس الكرم
إلا بلاوينا
بلينا ريق الخليفه
صدر الأباريق
لم الطريق العطش
من لحم خطاوينا
نخينا تحت الوصايه
وخزينا م التوهان
ونسينا إن الميزان
أخلاق وتربيه
غربيه يا مصرنا
ولا انت عربيه
غررتى بيه
وسَحَبتْ روحى بتارينك
لمى عجينك
وهدى صهد أنفاسك
هتلاقى راسك
بتنطح فى السحاب تانى
ساعة ماتتشمرى
مع قلبى وسنانى
ولسانى يقدر يقول لك
هاتى وتجيبى
ونصيبى يفتح لجيبى
ربع طاقة نور
طول عمرى باحلم
يغور الفقر من وشى
والعدل يمشى
على الحاكم وع المحكوم
وتعلي كوم الغلابه
وتسلسلي القضبان
والاقى بر الأمان
مبسوط وبيهزر
ساعتها هاقدر أعبّر
ع اللى مالينى
لما الرصاص ينتحل
شخصية الشينى
والحبر يرقص
على المسرح ببكينى
والجاف يصيبه الجفاف
بعد الزفاف بساعات
والمفردات تنتحر
من فوق دواوينى
مش لاقى حيطه تدارينى
والكسوف محتاس
وتمللى روحى وقلبى
للثوانى مداس
ويوماتى بارمى
أساس الحب ويهدوه
ويسلبوه ع الجفا
ويمسكوه خنجر
ياخلق هوووه الحقوا
كاس الحياه مرر
واتشفر العمر
على زيرو خمس خمسات
وحياة أبوكى يادوخه
تغيرى الموضوع
متقلبيش المواجع
ع العدم والجوع
هم الضلوع إللى نايم
والدموع حواليه
مش نافعه فيه الحجامه
والبخوروالكى
والأى لقيت عدلها لمَّا شرفتتى
وحلفتى ع البور
مايولد سعد ولا حلفه
الخلفه هافت
ولافت ع الرصيف والكيف
واحنا فى حرب الرغيف
واقفين لبعضينا
ونسينا إن الوصايه
والعصايه آيات
يا منكسين الرايات
السات لعب بينا
غضبت علينا الساعات
وكلتنا عقاربها
وخرابها سك الزمن
بالضبه والمفتاح
يامد يقين البراح
إمتى الصباح هيحين
والمجروحين م الضنا
ترتاح اساميهم
والضحكة تلمح عينيهم
ترقى وتسمى
غنى ياناى الندم
على تختنا مواويل
شمس الأصيل غربت
م الغش والتضليل
مات الضمير واندفن
والحب جوهّ الكفن
والود صابه العفن
والحقد نجمه بديل
يخلق هوووه الحقو
دم الوطن بيسيل