لين السماح جراح.. قصيدة للشاعر محمود رمضان

انا حلمي حدوته

حكيتها لأمي زمان

الدنيا مفروشه

سجاده م الأوهام

للإنس ويا الجان

ورسمت ليها الحلم

لوحة بلا ألوان

خافت علي

من خواتي الإنس

ما خافتش مره

إن أقابل جان

شافتني يوسف

والقميص موصول

بريحة أبويا

ودمع نازل

من عيون باهته

ما بتشوفي

ساكن في عتمتها

ضي الحقايق برهان

قالت لي يا ابني

مش كل اللي شايفه

ضي ………ضي

ولا كل اللي ماشي حي

جواه ضميره الحي

د ياما في أبدان

من ضعف النفوس فيها

كانت سكن للجان

كنسوها م الرحمه

فرشوها بالقسوه

والغدر والعصيان

حاسب ……

من اللي بيضحك

والقلب شايل غل

مش كل المخاوف

من الوحوش والليل

الخوف …….

من اللي يسامحك

لين السماح جراح

يشبه لشوك الفل

يا ابني البشر سلسلة

حلقات ومتسلسله

تلف العصور وتدور

وشمس تسبق ليل

وضلمه تولد نور

تتفرفت الحلقات

تتبخر القعدات

وناس تودع ناس

لكن غريزة البشر

حب الدهب والماس

ح تجيب الحكاية يمين

ح تجيب الحكاية شمال

تفضل تقلبها

الحال علي دا الحال

ح تطاردك الدنيا

ف حذاري تطلبها

مشوارك ما هش سالك

الدنيا بنيان

مبني من الهالك

ف هالك بيتمني

يصبح كما هالك

نفس النغم لكن

بيغيروا الموال

نفس النغم لكن

بيغيروا الموال

قد يعجبك أيضاً

وفد مصري يشارك في حوار معمق حول التعليم العابر للحدود

17 نوفمبر، 2024

رؤساء المهرجانات الدولية يتبادلون افكارهم على مائدة شرم الشيخ للمسرح الشبابي

17 نوفمبر، 2024