القصيدة ماعدتش تشبه ضِلك
وضِحكك بيفارق كُلك
اتهجى مفردات حروفك واقرا
(تتجافى جنوبهم عن المضاجع)1
قدم أول خطوة
بَدنك لسه شروخه ملزوقة
بين ضُفرك ولحمك
(يدعون ربهم خوفاً وطمعاً ومما رزقناهم ينفقون)2
لسه شيطانك معفرت الأفكار…!!
لسه كلامك مسجون ف حلقك
وانت بتراجع عدد التسابيح
فبتهرب منك أطرافك
لسه العُقدة اللي بتقفل روحك
بتخط حديت شبه ليل من غير قمراية
جرب تعملها
فنجان قهوة ع الريحة
وتشربها بمزاج..
مع إن حبة السكر بيفسدوا
قراية الغِيب ف فِنجانك المحشي وجع
إلا إنك بتقراه ف أصواتهم
لحن خديعة ورموز تمرد
على إيدك الممدودلهم جسر…!!
(فلا تعلم نفس ما أخفى لهم من قرة أعين جزاء بما يعملون)3
ماتخلهمش يبنوا قلبك بآخر قالب سواد..
واضحك للسما…
هوامش
(1) سورة السجدة – الآية (16).
(2) سورة السجدة – الآية (16).
(3) سورة السجدة – الآية (17).
