تقول د. هاله منصور أستاذ علم الاجتماع إن حياتنا، عمرنا، علاقات، أسلوبنا مع بعض، صورتنا عند بعض، توقعاتنا من بعض، كل ده ساعات بيرضينا، بيلبي توقعاتنا، بيحسسنا اننا فاهمين بعض صح، وساعتها بتهون المشاكل وتعدي الصعاب، لأننا بنسند بعض، بنخاف علي بعض، بنعزر بعض، بنعرف نطبطب وقت الوجع، ونقوي وقت التحدي، ونعذر ونسامح وقت الغلط، ونصفح ونحب وقت العتاب، وساعتها بنحس بالسعادة وتحلو الدنيا وتتحسن أحوالنا وتتغير نظرتنا للأشياء ونترجم تصرفاتنا مع بعض بحب وحسن نية وهنا بيهون الصعب وتحلو الحياة وتنور الوجوة وتتسع البسمة علي الوجوة ونقوي مع بعض في مواجهة كل الصعاب ونقول بقلب ورضا واحساس اننا فاهمين بعض، حاسين ببعض، بنحب بعض، وإحنا حاسينها وعايشنها ومستمتعين بيها، ولكن والف الف اه من لكن دي إللي بييجي وراها إحنا خلاص اتغيرنا، إحنا مش فاهمين بعض، إحنا دايما بينا سوء تفاهم، دايما بنقصد حاجة وتترجم حاجة ثانية، دايما قائمة توقعاتنا غير محققة مع بعض، مع اننا بنحب بعض.
صدماتنا بقت كتيرة، إحباطاتنا متتالية، وساعتها المشاعر بتتلخبط والرضا بيضيع ونشوف بعض بصورة ذهنية غير حقيقية وغير محببة وتتسع الفجوة وتتمحور زاوية الرؤية في الاتجاهات السلبية فقط وننسي كل حاجة إيجابية ونكرة التصرفات ونرفض التنازلات بإصرار ونبعد عن طريق أحلامنا، عن سعادتنا، عن سكة الرضا مع اننا بنحب بعض بس الوجع دايما علي قد الحب، والتوقع علي قد العشم، والجرح من الحبيب بيألم قوي، هنا بنقول لازم نفرمل ونتوقف ونراجع نفسنا ونفتكر كل حاجة حلوة، نغير زاوية الرؤية من السلبيات للايجابيات ونحسن الظن ونقرب المسافات ونعاتب بحنية ونعذر بحب ونستدعي أي رصيد إيجابي ندعم بيه قدراتنا علي الصفح، علي التسامح وحتي علي التنازل عند اللزوم، ولو ماقدرناش نوصل الحاضر بحلو الماضي بلاش نشوه الماضي.
خلوا الذكريات الحلوة حاضرة والعرفان موجود واذا كان ضروري الفراق، بلاش يبقي بانتقام أو وجع، ماحنا كنا قبل كدة حتي ولو للحظة حبايب، كان بينا حاجة حلوة، كلمة حلوة، لمسة حلوة، نظرة حنية حضنتنا في لحظة مودة.
عيشوا بحب ولو هتبعدوا يبقي خليها من غير كُره ده الكُره مرض، والحب صحة، حاولوا تبعدوا عن المرض وحتي لو جت لحظة فقدتوا فيها القدرة على الحب إياكم ومشاعر الكراهية فهي حارقة للجميع.. بسطوا خلافاتكم بحسن الظن، بالمودة بالرحمة بالمواجهة أحيانا والوضوح أحيانا، بالتجاهل أو الترفع أحيانا حتي التغافل والتغاضي بيكون مطلوب أحيانا، المهم لو مقدرتوش تحافظوا علي الحب، حافظوا علي اللا كره، وللحديث بقية إن شاء الله….