ليه ما قلت ليش
إنك مش ح تسلم عليا
و ح تعاملني بقسوة
لأول مره في حياتك
أيه يعني لما غيبت عنك
عشرين سنه
ما هي الأيام بنجري
حتى شوف
أديني واحد تاني
ما بفرقش كتير عنك
الفرق بس العكاز
و أربعين سنه خبره
في الحياه
طبعا أنت دلوقتي
فرحان فيا
بتقولي في سرك
أحسن..
أديك عجزت
لو كنت قعدت معايا
تحت العكاز
و كملت لك
حكاية ” جزيرة الدهب ”
و ملك القصر الأعمى
لكنك فقري
سبت الحكاية ف النص
و هربت
و أديك راجع
مش هحكيلك حاجه
و مش ح تنام
في حضني لحد الصبح
خليك كده
عيط على قد ما تقدر
مش ح أرجع
ومش ح أسلم عليك