بقلم / جمال الأفندى الزمر – مدير إدارة القوافل بجامعة جنوب الوادى
وحصوّه ملح وأتفلقت
ودابت فى زحام الزيف
وبتعدي يدوب صدفه
وتهرب زى وش الضيف
وتلعن سلسفين اليوم
تقّلب وضع مش مفهوم
وتتفرج من الكواليس
على واقع صبح مسموم
وتستغرب على الحاصل
تهل عليها م البراويز
صور باهته بدون فاصل
تداري كسوفها لمّا تشوف
خيوط الكسره مصلوبه
فى شيبه أب وتصّادر
دموع العمر لما يروح
وتسند فوق كتاف دابت
من الحسره بدون ماتبوح
تشوف النخوه متهانه
وخاليه الدم والإحاسيس
تشوف الفتنه مدسوسه
بيعلنها نباح الكلب في الكواليس
وبيخوّض في غيط مسقي
ولابس هيئه القديس
تشوف أهوال بتتكاثر
في موسم فيرس الكوابيس
تشد الواقع المووتور
وتلعن موسم الاباليس
تدارى كسوفها لما تشوف
أمير الصوره نمبر وان
وكنج الصفحه والارقام
وقدوه مجتمع فاضل
أميرة العفه والإلهام
وعم شاكوش بتسلطن
ويلحم لحنه بالبرشام
وبيكا وسيكا بالسنجه
يسنوا بالسيوف أنغام
تدارى كسوفها من الواقع
وتدخل عصر كان ياما كان
تدور ع المذاق والطعم
على الريحه فى طيف متصان
تلاقى الطيف رمى العكاز
ومحنى فى الطابور متهان
فتتأسف لواقع مُر
وتحلف باليمين م تبان
وحصوه ملح وأتفلقت
وسافرت فى زمن قد كان
