مش كان م الأول ..
تاخد نفس اللون الباهت ..
وتتسمي بأسم من أي كتاب ..
م الكتب المش ممنوعة ..
وتعلم قلبك .. حتى إن مات م الخوف ..
ميدقش دقات مسموعة ..
و تخزي شيطانك ..
أهي جات الشمس عليك ..
وشافوك فرع اخضر حي .. ناصب طولك ومزهزه ..
ع الشجرة الميت جذرها ..
من ميت سنة واكتر ..
مش واخد نفس ملامح أبوك .. ولا جدك ..
ولا فيك ريحة دم اخواتك ..
اهو قالوا عليك ..
مسحور وشيطاني
وقدمك اسود ..
وانك كل اسباب
الفقر..
القهر..
الجهل..
والمرض اللي مايتسمى ..
حتى الهدمة الساترة الجتة ..
جيالك من عند الغول ..
وامك رجلها مسلوخة ..
طبختلك .. كل اخواتك ..
واحد ورا واحد ..
وقالتلك كل .. واكلت ..
نغمة نشاز.. طلعت …
حرقت دم جميع أموات المسكونة ..
وترس غلط ..
لخفن أنظمة ..المكن المش شغال من أصله ..
وبدال ما تموت زي ماكل الناس بتموت ..
هتموت مصلوب ..
ع الشجرة الميت جذرها ..
من ميت سنة واكتر ..
وانا .. م الاخر ..
مش هـ ابكي عليك ..!
