»»
إطلالة جديدة بسطور شعر العامية للشاعرة عبير عبدالسلام الملقبة بشاعرة الريف ننشر منها عبر منصة المساء أون لاين سطورا من قصيدتيها مناوشات رمضانية ،”يهون الجرح من غيرك”.
،واحتفاء بقدوم شهر برمضان تقول الشاعرة عبير عبدالسلام:
نفحات رمضان هلا علينا بتهنى وتسعد ليالينا
مليان رحمات ورضا وبركات من رب كريم عالم بينا
بيجينا بخير وفوايده كتير
بنشوفها بجد وبعنينا
يا سلام لو يفضل طول العام
كنت أفرح وأعلق زينا.
مناوشات رمضانية
رمضان شرف وانت يا راجل
حتى ما جبتش ربـع زبيب
قوم اتلحلح وافرد طولك
دا انت برودك أمره عجيب
إنـزل هـات تموين وتعالى
و ايـاااك تـتلكع وتـغيب
هات على قد ماتقدر لحمه
إوعه تقول ملحقتش عيب
وكمان هات الزيت والسكر
سعره هيغلى ويبقى رهيب
والأسماك على كيفـك نقـي
إوعه تقول معاييش وتخيب
وبلاش تـتوجعلي يوماتـي
وتـسمعني كـــلام تأنـيب
دي العزومات هتكون على ودنه
هنجيب فيها قريب وغريب
💔
يهون الجرح من غيرك
يهون الجرح من غيرك
لكـن منـك بــيوجعني
ومش كل الحاجات تُغفر
ولآااا كـل الوجع يعني
ومش ذنبي إني حبيتك
وهبتك روحي مع قلبي
وكان رد الجميل منك
بتمن البخس بـتبيعني
تعالى حاسبني ف الاول
ما دام البعــد هايطوّل
حرام تحكملي بالإعدام
بدون ماتجيني تسمعني
وتبقى القاضي والجلاد
ويبقى ما بيننا ألف بلاد
ياظالم عمري م هسامحك
مادام قلبك ما هيساعني
ولو تركع قصادي يومين
وتبكى م الدموع بحرين
أنا أقسمت مش هرحم
ولآااا ندمــك يرجعني
🍂