»»
ومن بين سطور الحياة بحلوها ومرها يقطف شاعر العامية معوض حلمي الملقب بالفلاح الفصيح مختارات من فيض إنتاجه الغزير.
وقد أهدي منصة المساء أون لاين مقتطفات من قصائده البديعة ننشر منها :
أعصر لك “توت”، دكتور ، سينما الأصل والبدايات ، زرع أصول، طبع الحياة.
🍂
أعصر لك “توت” !!
وكأني دخلت ميدان الفرحة
بـدون تصـــــــريح
أبيـــض وصــــريح
شايل إحساسي وماشي
وباوزع ع الجماهير أحلام ،
حـــــواديت أنغــــام
وبالملم كل معاني النور
واطرد ف ضلام الليل الغاشي
واعصــــر لك توت
علشان لو عطشك زاد يرويكي
وجايبلك شوقي عيدان وسنابل
مـــــدي لي إيديـــــكي
دانا راسمك صوره هناك
ع السور الحاضن شوق غناويكي
والدنـيا ربيــــع حواليـكي
وان مره غرقت ف بحر عينيكي
مدي لي خيوط الضي شواشي
🍂
وبمناسبة انتشار شهادات الدكتوراة المزيفة.. ومنحها بصورة مستفزة ..
يقول الفلاح الفصيح:
دكتــــووور !!
إحذفها يابيه ، أنا مش مرتاح
فـلاح دكتــور ، دكتــور فـلاح
إزاي وانا شايل فاسـي سـلاح
أنا مش دكتور ولا هارضى يكون
إسمي المشهور من حمل سفاح
إحذفها يابيه ، أنا مش مرتاح
أنا سـارح ع الكــــارو ياصــاح
ف بـراح الغيـط دايـر ســـواح
أنا مش دكتور ولا هارضى نهائي
تكون الساحه سـداح ف مداح
إحذفها يابيه ، أنا مش مرتاح
انا باصحى ورزقي عـلى الفتاح
باروح الغيـط وابـــــدر أفـراح
انا مش دكتور ولاهااقـبل أبدا
أى مســــمى يكــــون فضــــاح
إحذفها يابيه ، أنا مش مرتاح
لو تكتب نقـبي واكـون مـرتاح
إكتب إنسان بيـــــداوي جـراح
انا مش دكتور ولاهااقبل اكـون
غير واحد شـاعر عاش فـلاح
إحذفها يابيه ، أنا مش مـرتاح
لابـس جـلابيـه وبلــدي بــراح
حواليا شـباب ، وصبـايا مــلاح
ولاعمري اتخيل ، ناس تتـمــهزأ
وتقوم توصفني ، دكتــور فـلاح
فـلاح دكتــور ، دكتــور فــلاح
إحذفها يابيه ، أنا مش مـرتاح
إحذفها يابيه ، أنا مش مـرتاح
🍂
سينما الأصل والبدايات
ملت وداني تسمع التفاهات
باسمع أغاني لخلـق حشيشه
وواد غواني مدعو بحبيـشه
باعوا المبادئ ع الهوا حصري
وحشاني سينما الأصل والبدايات
ل ابيض ول اسود أجمل الروايات
محتاج افرفش حبة بالمصري
محتاج لسمعه يناكف القصري
محتاج شكوكو ولعبه برموشه
ويزيد غناوي يهز طربوشه
والكل غاوي يزيدو ويعيدو
واشوف حميده تهد ف ابن حميدو
والأسطى حنفي ف فيلم نورماندي
وأم حميده المتينه والباز أفندي
عاشق عزيزه وعيون عزيزه
واسمع بكيزه تنادي على زغلول
يبقى المزاج معدول وعال العال
واشوف سكينه وجوزها عبد العال
وولاد حارتنا لعمنا محفوظ
والسكرية تعدي ع الأراجوز
واسمع أغاني المعجزة فيروز
وحضرة جانم ، حضرة جانم
فاكرين نزاكـه وسليمان غانم
تمثيل طبيعي يشدك التاثير
والسهره تحلى نحل ف الفوازير
واحب الريحاني ف دور سلامه
والست ثومه في فيلم سلامه
وفاتن حمامه وسحرها النادي
تنده هنادي يزقزق الكروان
واحب ريا وقلبها الصـــوان
واحب رشدي مهما غنى وقال
واحب طه يفـــن بالمــــوال
أصـول بلاده وبيها متقـــيد
واسمع أمينه تنادي سي السيد
ملت وداني تسمع التفاهـات
باسمع أغاني لخـلق حشيشه
وواد غواني مدعو بحبيشه
باعوا المبادئ ع الهوا حصري
محتاج افرفش حبة بالمصري
محتاج لسمعه يناكف القصري .
🍂
زرع أصـــول
ليلنا الطويل معتوه ، ومـش طالعله نهار
ولاأخ بينجد أخـوه ، ولاجار بيزور الجار
خنقنا خيط الضي مش لاقي طاقه يفوت
يونس لقاه الحوت ، وحـوتنا كـوم أوزار
……………………..
الدنيا غابه وقست ،
ومعادش فيها أصول
الطيبه بينا اتنست ، والود مش موصول
برد وســلام الـنار ، على إبراهيم نجاه
واحنا اللي سيبنا الآه ، تجرحنا زي الغـول
🍂
ومن رباعيته أيضا ..
طبع الحياه
وكان ناوي يـداوي الجـرح بالفـــرحـه
ويفتـح قلـبه للضـحـكه ويـنسى الآآآه
فامقدرشي عشان طبع الحياه جارحه
ودمـعــــــة عيـنـــــــه كـات فـضــحاه
🍂
يذكر أن الشاعر معوض حلمي الملقب بالفلاح الفصيح ، هو ابن قرية منشأة بطاش تمي الأمديد بمحافظة الدقهلية،ومن رموز شعر العامية المصري .
صدر له عدة دوواين منها، عنقود مشاعرك ، قلبي إمام، رباعيات الفلاح الفصيح عن دار الرضا للطبع والنشر.
كما صدر له ديوان “ع الحصيرة” الفائز بالمركز الأول في مسابقة الشيخ مبارك المطوع لشعر العامية عن دار ميتابوك للطباعة والنشر، وديوان مراكب ضميرك “مربعات” عن دار ميتا بوك للطبع والنشر.