إلى الأستاذ / عبده عبدالعال مسلّم بمناسة خروجه إلى المعاش
سندي وضهري
أخويا الكبير..
جبلي ونهري
بشاير الخير..
النهاردة هايمشي
كأنه أمير ..
هايقطع بيَّا
وهايبان عليّا
ولو كان عليّا
هامدّله كتير ..
خمس سنين يزرع جناين
ويفرح بزهر مزهزة وباين
وخمسة عشان يحارب الكسول
ويداوي سواد الحقود واللي خاين..
وخمسة كمان يعطّر سمانا
وخمسة عشان يلوّن هوانا
وخمسة عشان يفرّح حبايبه
من عيال الحضانة ولحد المدير..
سندي وضهري
أخويا الكبير
النهاردة هايمشي كأنه أمير..
لا ظُلْم ظَلَم
ولا مدّ إيد..
وبقلبه خدم
وبصدره الحديد
عمل لينا جنّة
وبساتين وحنّة فيها نطير ..
طبيعي إنه يمشي
وراسه ف السَّما..
دا محبة الناس
له أوسمة..
وبعرق جبينه
علي وسما
ودا ف عرف الغلابة
أفضل سمة
لايمكن تشوفها غير في الكبير..
هوَّ بطيابته .. حبّه الجميع
وبعزيمته ونصاحته .. خلّا الكون وسيع
يأمر في ورده .. فـ يلبّي ويطيع
ف نقوله يا عبده : أنت خطير..
ويضحك ويصفى
وينعم كالحرير..
ويسيبنا ويمشي
تقولشي أمير!!!