بقلم الإعلامية: سارة حماد
(الأكاديمية العربية لعلوم الإعلام)
————————-
من وحى حادث عروس الإسماعيلية اللي ضربها جوزها ..اللي سابك تتحملي مسئولية ولادك والبيت لوحدك وشال إيديه بحجة إنه بيصرف بس وساعات أقل من المطلوب ده ضربك بردوا ..واللي راح يشوف مستقبله وشغله علي حسابك ضربك بردوا ..
واللي خبي عنك فلوسه وبخل عليكى وصرف علي روحه بس ضربك بردوا ..اللي هانك لما عرف عليكى بنات وستات غيرك بحجة انه سيدنا يوسف عليه السلام وانت مش مهتمة ضربك بردوا ..
اللي عمل نفسه نموذج ومثال يحتذي به وهو منافق ومدعى ضربك بردوا ..اللي سرق من شغله أو من أهله أو من فلوسك وقال عشان مش قادر علي مصارفك وهو قادر ضربك بردوا اللي حب أهله وكره أهلك ضربك بردوا ..اللي لبسك البيكيني وسابك تتبسطى مع القريب والغريب بحجة الثقة ضربك بردوا ..
اللي سمح لنفسه يبص علي صديقتك أو معرفتك ضربك بردوا اللي نكد علي بيته وراح فرفش بره.. ضربك بردوا ..اللي غرقك في المشاكل وخد فلوس شغلك وألزمك بما ليس من مسئوليتك ضربك بردوا ..اللي هلك صحتك علي شغل البيت وتربية الولاد ضربك بردوا ..
اللي قعد عالقهوة عشان انتى تشتغلي وتجيبي فلوس ضربك بردوا .. وحكايات وروايات كتير..مش كل الضرب بالإيد يا جماعة ..ليه كل دول كملوا أو بيكملوا في ناس أطلقوا أو في المحاكم.. ببساطة هو رصيد محبة بيخليك تتحمل وأول ما بيخلص كل حاجة بتتغير مش عندهم أوعندنا أومصر أو بره مصر ..إطلاقا في كل مكان ..كل دي صنوف ضرب “الحبيب” أقصد من كان زوجا وحبيبا !!