هو دا الوقت المناسب للمشاهدة
طرقع لبان
واضحك بشدة
كل اللى بيبعوا الحِكم مجانين
اعقل ، بلاش
يا ابني تعيش الدور
سيب الهوس
هو اللى يتكلم
الضحك باكى يا عم يا فيلسوف
كل الورق ع الطاولة
بقا مكشوف
طرقع لبان
وافرد شراشيب الورق
الليل طالعله عيون
بحلق ف وش الخوف
تعالى نرقص تحت تهديد السلاح
وسيب لقلبى مساحة للحنجلة
الحِكمة تعبت ، ولا صابها جنون ؟
المهلة خلصت وانت بتتلكع
الشمس باردة والقمر ولع
أيامنا تشبه أكروبات السيرك
بلياتشو صامت وضحكته توجع
جمعت أيامى ، وسافرت
والدنيا رسمت دمعها حِنَّه
وأنا بين مواسم العطش بشتى
مستنى حتى بلتين للريق
وكل ما دا الطريق بيضيق
لملمت روحي والوان الحياة
ورسمت بيهم عُقدك البمبى
جايز يعود الطير لعشك
وتفهمى مين اللى حبك
ومين غشك..
معرفتكيش
ضهرك ولا وشك
أكيد فى فرق فى المسافات
بين اللي مات ع الرصيف
وبين اللى عششلك