ومن سطور شعر العامية أهدانا الأديب الشاعر ممدوح عبدالهادي غيضا من فيض إبداعاته الشعرية..يتغني فيها بحبه وعشقه لنيل مصر الأصيل منبع الخير والأمان ننشرها عبر هذه السطور..
🍂
عطشان يا نيل
عطشان يا نيل
يا مخبي الأمان في الجوف
طول عمرك أصيل يا نيل
قوى ما تعرف خوف
عطشان يا نيل
وأنت ملامحك بشرتى القمحى
وأنا ملامحي بتشبهك
ياراوى بميتك قمحى
يطرح جنين يشبهك
يطيب من الوجع جرحى
سنين موجوع يا نيل
وخايف في يوم تغرف
الأرض تحبل منين
لو بطلت أنا اعرق
عرق الجبين بيهون
بقمحة وبتمرة
وقعدة في الضلة
زرعتى تعلى
تطل وتشوفك
يجرى لها ريقك
تشرب وترويها
ضلوعى أنا ابنيها
جسور على الشطين
ولا عمرى اشوفك حزين
يانيل
ياللى أنت في النني
لو يوم تخاف من العطش
ارويك أنا بدمي