»»
إطلالة جديدة ومبدعة من وحي الأحداث تجسد كفاح الأبطال من أهل فلسطين الحبيبة،وفي ثياب أنيقة يعود إلينا شاعر العامية معوض حلمي الشهير
الفلاح الفصيح عضو اتحاد كتاب مصر ،ليهدي المساء قصيدتيه، قبة الصخرة وغزاوية..
ننشرهما عبر هذه السطور..
🇪🇬 🇵🇸
قبة الصخرة
ألا أونه.. ألا دوي.. ألا تريه
تعالي ياست تعالى يابيه
فردنا الشعر ع الناصيه
كلام بايش كلام كداب
بألف كتاب عن الأقصى
ديوان شعري على روايه
على قصه
وقيمنا مزاد هانتوصى
بدون مليم ولا أبونيه
تعالى يابيه
تعالى يابيه
تعالى وبص واستقصى
وشوف الشعر بيتمايل
قباحه وزم واتوصى
وسيبنا نصاصه في الساحه
وجابوا الهم واللبصه
هاقـولك إيه تعـالى يابيه
تعـالى يابيه
تعالى وشارك الزفه
وهات الست بالقفه
تعـبي كلام
كلامنا كله في الفاضي
مفيش قاضي
يوضي الكلمه بالعفه
وسيبنا القدس عيانه
وسيبنا غزه تتكفى
ومالت كفة الموازين
عشان عايزين ومابنديش
بنعبد ريش
وأرض الخير هجرناها
وسيبناها عيدانها ياباس
عشان بنعاني م الإفلاس
قلعنا القيمه والإحساس
وسقينا المعاني حشيش
حروفنا كلها تعفيش
ومابترويش
ولابتطرح سنابل ليه
تعالى يابيه
تعالى يابيه
دا سوق الشعر
سوق واسع
وفيه القله واللاسع
وعرضه كتير
وفيه الغاوي للشهره
وللتصاوير
بيقـولي ضمير ..؟
وريحة الحروف بودره
والقصايد كلها مانيكير
مفـيش تغيير
مادام معروضه أصنامهم
وأغنامهم بتنفش ريش
وقالوا لينا فرمانهم
حروف العفه والأخلاق
مابتعلـيش
ولا هايعيش معانا ضمير
في سـوق التيه
تعـالى يابيه
تعالى يابيه
هاقولك حكمتي وافيه
قالوها زمان
خدوا الحكمه من المجانين
وانا المجنون في ساحة الشعر
باجيب الفكره بالعافيه
جمـال الشـعر مـش في الـوزن
ولا التشكيل ولا القافيه
جمال الشعر في الإحساس
إذا لامس آهات الناس
بيصبح لحن ويغنوه
ويصبح ورد ويشموه
وكتير من الشعرا عابوه
عشان كتبوه كلام تدليس
يبان واعظ بيهدينا
وينشر حكم ع الفيس
ويسرح بينا ويبيعنا
ويوجعنا كدا بغناويه
فنقي براحتك الدواوين
وخد م الشعر أحلى ما فيه
تعالى يابيه
تعالى يابيه
تعالى ووحد الواحد
مفيش حتى كتاب واحد
عن شهيد الأمس
شهيد اليوم
شهيد بكره
وسيبناهم
يلفوا الحبل ع البكره
أيا أيها المكره
ربيعكم هد في جيوشي
أيا أيها الفــجره
على التطبيع ماتحبوشي
هـنا وجـعي
هنا الأقصى
هـنا غـزه
هنا قبة الصخره
وعنها حروفي بتنادي
وسايله دموعها للتنبيه
تعـالى يابيه
🇪🇬 🇵🇸
غــزاويـة
أنا غزاوية ياولا وفلسطينيه
النخوه فيا ياولا والعزه فيا
ودعت خوفي واندفن وداريت جراحي
جهزت للموت الكفن وسـلاحي صاحي
أنا وحدي وسط المعركه باعلن كفاحي
واشد حيل اللي انجرح وابقى مداويه
أنا غزاويه ياولا وفلسطينيه
النخوه فيا ياولا والعزه فيا
باوهبـــها روحـي ياولا والرب قـابل
وولادي زرعه مخضره طارحه السنابل
منخافش من مكر العدا ولا م القنابل
أنا ام الشهدا ياولا حره وعفيه
أنا غزاويه ياولا وفلسطينيه
النخوه فيا ياولا والعزه فيا
أطفـال بلـدنا ياولا دي رجال قـويه
هادول ملايكة ربنا وصـحاب قضيه
هايهـدوا اوكــار العـدا والصهـيونيه
وتعيش بلدنا بعزها وتدوم عفيه
أنا غزاويه ياولا وفلسطينيه
النخوه فيا ياولا والعزه فيا
أنا ام ربت للبـلد أجـيال تحـــارب
وعملت قلبي المركبه والضهر قارب
باداري ياما ف دمعتي وادفن حبايب
والصبر زايد ع الألم والروح وفيه
أنا غزاويه ياولا وفلسطينيه
النخوه فيا ياولا والعزه فيا
ماتقولش فينها عزوتي دانا عزمي نار
بيشيل غشاوة ضلمتي ويجيب نهار
عشـان ينـور سكـتي وابنـي لـي دار
ولاجل يوم الملحمه هاصبر شويه
أنا غزاويه ياولا وفلسطينيه
النخوه فيا ياولا والعزه فيا
🍂