هـويداالقاضي
استقرار ملحوظ شهدته أسعار السلع والمنتجات داخل المجمعات الإستهلاكية ومحال البقالة التموينية خلال صرف المقررات التموينية لشهر نوفمبر بعد إشاعات زيادة أسعار السلع على البطاقة التموينية ، ولم ترصد ” المساء ” أية زيادة سوى في سلعة زيت الطعام ، التي ارتفعت 4 جنيهات كما قال الموطنون ، خلال صرفهم مقراراتهم وهو الشيء الذي تفهمه الكثير منهم وأرجعه إلى زيادة الأسعار العالمية، المساء كما تجولت في المجمعات الإستهلاكية لرصد حقيقة زيادة الأسعار في السلع التموينية ، تجولت أيضا فى اسواق الخضار والفاكهة لترصد على ألسنة المواطنين والبائعين الأسعار الحقيقية لها ، والتي جاءت جميعها على ” أد الأيد” وفقا لتعبير المواطنين .
وداخل مجمع استهلاكي التوفيقية قالت أسماء متولي ربة منزل أثناء صرفها السلع التموينية الشهرية ، أسعار كل حاجة زي ماهي فقط الزيت هو اللي زاد سعره لـ25 بعد ما كان 21 جنيها ، لكن في الحقيقة الفرق كبير قوي سعر السلع على البطاقة التموينية وفي السوبر ماركت ، السعر هنا أقل كثيرا ، وكمان أسعار منتجات سيارات القوات المسلحة في الشوارع ارخص ، الحمد لله ربنا يديمها نعمة .
جمال الدين صادق على المعاش قال : الأسعار كويسة والسلع كلها نفس تسعيرتها بتاع الشهر اللي فات ماعدا الزيت ، لكن نتحمل مدام باقي السلع متوافرة وأسعارها 10/10 ، وكل اللي بحتاجه باخده من التموين وده بفضل مجهودات الريس خلى كل حاجتنا متوفرة .
متولي نصر 70 سنة قال انا نزلت أنا والحاجة زوجتي نصرف التموين ، بصراحة الأسعار ثابتة ماعدا الزيت ، وده متوقع لأنه عالميا زاد سعره واللي يسري على الناس يسري علينا لكن السكر نفس سعره 8,5 جنيه والرز8 جنيهات والمكرونة 450 جرام 4 جنيهات
مها مصطفى بائعة في مجمع استهلاكي التوفيقية قالت ، الناس جاية تصرف التموين وعارفة إن الأسعار غليت في السلع التموينية وكانت ليها رد فعل غاضب بعض الشئ ، لكن بعد صرف السلع وتأكدها إن الزيادة في سعر الزيت فقط 4 جنيهات وأن الوضع عام على العالم كله تراجع غضبهم
وقالت فاطمة محمد بائعة في مجمع استهلاكي : اي حد من الناس اللي جاية تصرف تموين بتزعل لما تعرف سعر الزيت ارتفع ، لأنه أكثر سلعة بيستخدموها في طهي الطعام ، ودوري اني بهديهم بكلام كويس وفعلا بيستجييوا لما يعرفوا في سلعة بتعوض سلعة .
عبير فؤاد موظفة : قالت : والله أنا تقريبا بنزل السوق مرتين في الأسبوع بعد خروجي من العمل ، لكني لم الحظ تغير أسعار بزيادة أو نقص هذا الأسبوع عن الأسبوع الماضي فهي مستقرة دون زيادة .
وأمام عربة البطاطس والبصل ، وقف صاحبها عم جمال سيد ، وعرفنا أن سعر البصل 5 جنيهات و البطاطس من 8 لـ 9جنيهات ، وان السعر حسب النوع وإن في للتحمير وفي للصينية وكله حسب ضمير ه .
وأما الطماطم ” المجنونة ” دائما فقد استقرت على سعر 5 جنيهات للكيلو أو 2,5 بعشرة جنيهات كما قالت أم عبدالله التي وقفت على عربة الطماطم ، تمتدح سعرها وهي سعيدة بعد ما كانت بـ12 جنيها في الأيام الماضية ليقول عم عوض عبدالله بائع القوطة ، اليومين دول سعر الطماطم في الأرض ولسة هاينزل تاني وهتبقى الـ4 كيلو بعشرة .
فاطمة عبد الهادي اصغر بائعة خضار بسوق المغربلين فوقف على فرشتها زبائنها وقال محمد جميل موظف ، أنا معتاد الشراء من فاطمة أسعارها رخيصة والحمد لله النهاردة اى حاجة بـ5 جنيه ، عندها الكوسة بـ5 جنيه والخيار بـ5 و والبصل الـ3 بعشرة جنيه والملوخية بـ5 حاجة حلوة الحمد لله
وأما أحلام أشهر بائعة خضار في السوق فتزاحم عليها زبائنها الذين أخذوا ينادونها يا” أم يوسف ، مشينا ” لكي تتناول منهم البسلة ، والفلفل الرومي والباذنجان لوضعها على الميزان وأما هي فقدامكست بثمرات القرنبيط وأخذت تنادي بـ 5 جنيه الواحدة ، عرفتنا أن سعر البسلة بـ10 جنيهات والفلفل بـ5 جنيهات والبتنجان بـ5 جنيهات واصفه إياه وضحكتها تملأ وجهها بأنه “كله خضار طازه وعسل
وقالت أم محمود ربة منزل خلال شرائها الليمون بصراحة الأسعار كويسة وكل حاجة معقولة والتقطت منها الحديث أم سلامة بائعة الليمون ، وقالت سعر الليمون في النازل عشان ده موسم تخليل الزيتون وفي بـ5 جنيه بس أصغر شوية والسعر ثابت من اسبوعين ومش هايزيد غير على دخول شهر رمضان .
أما صبحي عطية بائع الجزر فقال : الجزر النهاردة الكيلوونص بـ10 جنيه الاسبوع اللي فات كان بعشرة جنيه و11 واللفت الـ3 كيلو بـ10 جنيه .
عم صبحي67 سنة من سكان المنطقة ، كان واقفا على عربة بائعة البرتقال والرومان لينتقي حباتهما فقال : السعر حنين وعلى أد ادينا الكيلو ونص بـ10جنيه ،والكيلو بـ6,5 وأما أم علي بائعة البرتقال نفسه فقالت سعر البرتقال والرمان ثابتين من الاسبوع الماضي والناس بتشتري ومبسوطة ويارب مايزيد عشان الغلابة تاكل.
سعيد حامد بائع الموز وقف على عربته واضعا تسعيرته الكيلو بـ10 جنيه وقال : الموز بعشرة جنيه وسعره ما زدش من فترة وباذن الله مش هايرفع أكتر من كدة بصراحة احنا بنعرف نبيع والزبون بيشتري .
وقال حربي ناصر بائع الجوافة : ليها فترة رخيصة الكيلو بـ7 جنيه والكيلو ونص بـ10 ولسه سعرها هاينزل تاني ، والحمد لله باجي ابيع واخلص واروح وارجع تاني يوم بجوافة جديدة .
أمينة عوض ربة منزل سيدة مسنة ، قالت الخضار والفاكهة سعره على أد ادينا اللحمة والفراخ بس هي اللي غالية وأنا معاشي 300 جنيه وعندي اسرتي كبيرة وعيالي مش لاقين شغل ياريت يرخصوا اللحمة والفراخ ويشغلوا لي عيالي .