افكار طبخ و تجهيزات لرمضان
مقدمه من الشيف وصال مصطفى
رمضان على الأبواب وكل ست بيت نفسها تعمل أحسن أكل و حلويات و مشروبات لأسرتها لذلك
تقدم لكم الشيف وصال مصطفى افكار مطبخيه
لتوفير الوقت والجهد خلال شهر رمضان المبارك
1- قبل رمضان إكتبى إحتياجات البيت ( أكل – مشروبات -توابل – صابون – كركديه – تمر هندى -دوم – ملح …. كل حاجه .. فى ورقه حتى لا تضطرى تشترى و تنزلى فى رمضان و تضيعى وقت العباده .
2- عمل كميه كبيره من البصل المفروم و تعبئتها فى أكياس و حفظها فى الفريزر.
3- عمل ثوم مفروم و تجميده مفروم فى علبه محكمة الغلق او كيس يكون افضل واسهل ..
وثوم مفصص .
4- عمل كميه من عصير الطماطم و تعبئتها فى أكياس فى الفريزر ( و إذا لم تتمكنى من ذلك ممكن تجميد الطماطم كما هى و عند تسييحها هاتلاقى قشرتها إنفصلت عنها …إنزعيها و إضربيها فى الخلاط بتبقى كأنها طازجه بالظبط )
5- إعملى كميه من اللحم العصاج و جمديه فى الفريزر و يبقى سهل و جاهز وقت الحاجه
6- عمل كميه من عصاج اللحم المضاف إليه عصير طماطم و ملعقة صلصه و تبليها و جمديها بتنفع ( لعدة أصناف .. للمكرونات – المسقعه ….)
7- إعملى كميه كبيره من ((صلصة الطبيخ : تحمرى البصل فى سمن ثم تحمرى اللحم حتى يتماسك ثم تضيفى عصير الطماطم و تترك حتى يبقى اللحم نصف سوا ثم تضيفى الملح و الفلفل )) و تبقى جاهزه على وضع الخضار فيها و قسميها فى أكياس كل كيس يقضى طبخه و جمديها (بدون وضع الخضار فيها و لما بتسيح بتبقى كأنك لسه عاملاها بالظبط )) و بعد ما تسيح وقت الحاجه ضيفى الخضار المطلوب .
8- إعملى خلطة المحشى (( البصل و الخضره و الطماطم و اللحم المعصج و السمن و الملح و الفلفل )) و ممكن تعطيها غلوه على النار لو عايزه و ممكن لأ… و جمديها للمحشى بدون وضع أرز نهائى … و لما بتسيح بتبقى كأنك لسه عاملاها بالظبط و بأقول تانى (( بدون وضع الأرز ))) تضعى الأرز قبل عمل المحشى مباشرة .
9- إشترى دماسة فول حجم كبير حتى لا يحدث فوران للفول و أتعلمى طريقة تدميس الفول هاتوفرى وقت و جهد كبير بوجود الفول المدمس للسحور فى البيت .
10- إعملى الزبادى فى البيت ينفع للسحور طبعا و للسلطات مع الفطار و بعض أصناف الحلويات .
11- لو عندك شوربه زياده ضعيها فى أكياس و جمديها تنفع للفطار ( الشوربه صنف ثابت طبعاً كل يوم ) فى رمضان و ممكن تعملى بيها الملوخيه و الرقاق
12- إعملى عصير المشمش فى البيت و جمديه فى الفريزر .
